Pilipinas VisMin Cup Mindanao leg gisuspenso sa GAB
Tungod sa kontrobersiya nga nahitabo sa Visayas Leg sa 2021 Pilipinas VisMin Super Cup, ang Games and Amusement Board (GAB) mimando nga dili lang usa ipadayon ang Mindanao leg nga gikatakda unta buksan sunod buwan didto sa Dipolog City.
Gipagawas sa GAB ang maong desisyon Dominggo sa hapon, upat ka adlaw ang milabay human ang kontrobersiyal nga duwa sa Siquijor Mystics ug ARQ BuildersLapu-Lapu City Heroes diin adunay mga pasangil kabahin sa game-fixing.
Sa maong duwa, ang duha ka teams naglisod pagpasulod sa ilang free throws ug mi-combine lang kini’g 4-of-29 sa free
throw line. Aduna pay higayon nga misipyat ang players sa ilang layup bisan wala nay gabantay.
Matod sa GAB, nga padayon gihapon ang duwa sa Visayas leg apan ipaubos kini sa “close monitoring” nga estado.
“We are in the process of investigation and seriously looking into the allegations of wrongdoing. The board would like to further observe the ongoing Visayas leg before giving a go-signal for the other,” matod sa opisyal nga statement sa GAB. Dugang sa GAB nga wala mahunong ang ilang imbestigasyon bisan paman gihatagan na og sanction sa liga ang
teams nga nalambigit sa maong duwa.
Ang organiser sa VisMin Super Cup misilot og lifetime ban sa miyembro sa Siquijor team, samtang gipamulta ug gisuspenso ang unom ka players sa Lapu-Lapu City apil na niini ang coaching staff.
Mikuha og daghang reaksiyon sa social media ang maong duwa. Lakip na sa mi-react ang PBA players sama nila Kiefer Ravena, Marc Pingris, Paul Lee, CJ Perez ug coach Charles Tiu.
Ang maong duwa gipahunong sa halftime nga adunay iskor nga 27-13 pabor sa Lapu-Lapu City.