KUTAS NGA KADAUGAN
Knicks mipukan sa Celtics sa 2 ka OTs
Daw lungag sa dagom ang gilutsan sa host New York Knicks una nila nadispatsar ang Boston Celtics, 138-134, pinaagi sa duha ka mga overtime kagahapon, Oktubre 21, 2021 (RP time) sa National Basketball Association (NBA).
Gipangulohan ni Julius Randle ang Knicks pinaagi sa iyang 35 puntos samtang nidugang og 32 puntos si Evan Fournier lakip na niini ang go-ahead three-pointer sa hinapos nga bahin nga maoy nagtiklo sa iyang kanhi team.
“At the end of the day, we found a way to win a game,”
matod ni Julius Randle. Si Jaylen Brown, kinsa baguhay lang naalim gikan sa Covid-19 ug gikan pa sa quarantine, maoy nangulo sa Celtics pinaagi sa iyang career-high 46 puntos nga iyang napupo sa iyang pagduwa og 46 ka mga minutos.
“My breathing felt irregular but fine for the most part. Toward the end I could feel my heart beating through my chest,” matod ni Brown.
“It would have been better if we got a win.” Hapit gyud midaog ang
Celtics.
Si Jayson Tatum nakakompleto og three-point play aron hatagan ang Celtics og 134-133 nga labaw sa nahabiling 1:05 minutos sa ikaduhang overtime. Apan gitubag kini og three-pointer ni Fournier aron ibalik sa Knicks ang labaw, 136-134, sa nahabiling 56 ka mga segundos.
Human niini, naghinugtanay sa ilang bakus ang duha ka mga kampo apan ang Knicks ra’y nakadugang pa og puntos nga nahimo ni Derrick Rose sa nahabiling 22 ka mga segundos.
“It was crazy,” asoy ni
Fournier.
Sa laing mga duwa, ningdaog ang Charlotte Hornets batok Indiana Pacers, 123-122, Chicago Bulls batok Detriot Pistons, 94-88, Washington Wizards batok Toronto Raptors, 98-83, Memphis Grizzlies batok Cleveland Cavaliers, 132-121, Minnesota Timberwolves batok Houston Rockets, 124-106.
Ninglampos sab ang Philadelphia 76ers batok New Orleans Pelicans, 117-97, San Antonio Spurs batok Orlando Magic, 123-97, Utah Jazz batok Oklahoma City Thunder, 107-86, Denver Nuggets batok Phoenix Suns, 110-98, ug Sacramento Kings batok Portland Trailblazers, 124-121./