P8.4M balor sa shabu nasakmit sud sa 24-0ras sa CV
Sulod lang sa 24-oras nga anti illegal drug operations sa managlahing dapit sa Central Visayas, dili mominos P8.4 milyunes nga balor sa illegal nga drugas ang nasakmit sa Police Regional Office (PRO) 7 niadtong Martes sa gabii, Mayo 17, ngadto sa Miyerkules, Mayo 18, 2022.
BALAMBAN
Alas 12:45 sa kaadlawon sa Martes, Mayo 17, ang mga sakop sa Provincial Drug Enforcement Unit (PDEU) uban sa 1st Provincial Maneuver Force Company ug Balamban police station sa Cebu Police Provincial Office ninglusad og buy-bust sa Purok 1, Barangay Arpili, lungsod sa Balamban.
Nasikop ang giila sa kapulisan nga high value individual nga si John Marlon Alunes Lausa, alyas “John-John”, 33, taga Barangay Bunga.
Nakuha gikan sa suspek ang 110 ka gramo sa gituohang shabu nga mobalor og P748,000,00 lakip ang buybust money sa iyang posisyon.
TOLEDO CITY
Usa milyon ka pesos nga balor sa illegal nga drugas ang nakuha sa kapulisan atol sa ilang gilusad nga buy-bust sa Sitio Sta. Ana, Barangay Poblacion, Toledo, ala1:50 sa buntag sa Miyerkules, Mayo 18, 2022.
Ang kapulisan niila sa suspek nga si Christine Amodia Monte de Ramos, alyas Tin taga Tipolo, Barangay Awihao, Toledo.
Si Monte de Ramos nakuhaan og 160 gramos sa gituohang shabu nga mo kantidad og P1,088,000.
Nalakip sa ilang watchlist si Monte de Ramos nga nag lihok sa dakbayan sa Lapu-Lapu ug mga silingang siyudad.
CEBU CITY
Nasikop sa Mambaling Police Station ang 20 anyos nga lalaki nga namaligya og illegal nga drugas sa dalan C. Padilla, Barangay Duljo Fatima, alas 6:30 sa gabii, Mayo 17, 2022.
Ang nadakpan giila nga si Bryan Duallo Justo, 20, nakuhaan og 700 gramos nga adunay mobalor og P4,760,000.
Sigun sa imbestigasyon sa Mambaling Police Station, ang maong illegal nga drugas nga ilang nakuha kang Justol kabahin pa niadtong kinilo nga ilang nasakmit sa milabay nga buwan.
Sa Sitio Capaculan, Barangay Tisa, nasikop sa kapulisan gikan sa PRO 7 si Rocelito Parba Alcuizar, 38, alas 10:00 sa gabii sa Martes, Mayo 17, human makuhai og 50 gramos sa gituohang shabu nga mo kantidad og P340,000.
BOHOL
Ang Regional Police Drug Enforcement 7 inabagan sa Tagbilaran City Police Station nakadakop og laing duha ka high value individual sa Purok 5, Barangay Tip-Tip sa maong siyudad.
Ang mga suspek giila nga sila si Jezrel Aaron Estique Butalid, alyas Ace, 38, ug Mary Mae Pocot Pondoc, 26, diin nasakimit gikan sa ilang posisyon ang 75 gramos nga shabu nga dunay estimated value nga P510,000.
NEGROS ORIENTAL Alas 2:31 sa hapon, nakasakmit ang Negros Oriental Police Provincial Office(NOPPO) uban sa Maritime police ug PNP Drug Enforcement Group 7 sa dul-an usa ka milyon ka pesos nga balor sa illegal nga drugas sa ilang hiniusang buy-bust sa Purok Fatima, Barangay Bagacay.
Ilang nadakpan si Davi Bendijo, 47, taga Barangay Looc sa maong siyudad nga nakuhaan og 100 gramos nga gituohang shabu nga balor og P680,000.
Tungod niini, si Police Brigadier General Roque Eduardo Vega, hepe sa PRO 7, midayeg sa mga police nga padayon sa ilang kampanya batok sa illegal nga drugas sa tibuok rehiyon 7.
“Atong pang hingusgan ang kampanya batok sa iligal nga drugas ug uban pang krimen sa rehiyon. Magtinabangay lang ta aron mabuntog nato kini,” matod ni Vega.
Ang mga suspek giandaman nag kaso nga may kalapasan sa Section 5 ug 11 sa Republic Act (RA) 9165.