Financial aid nga di ma-claim ma-forfeit

Ang Cebu City Treasurer’s Office (CTO) nipasidaan nga ang hinabang pinansiyal gikan sa Cebu City Government mahimong ma-forfeit kon dili kini ma-claim sa mga benepisyaryo sa o sa dili pa ang Lunes, Mayo 23, 2022.

Si City Treasurer Mare Vae Reyes niingon sa SunStar Cebu Miyerkules, Mayo 18, 2022, nga 80 porsiyento pa lang sa gitarget nga 49,000 ka benepisyaryo ang naka-claim sa ilang cash assistance.

Ang Kagamhanan sa Dakbayan nagsugod sa pag-apodapod sa P277 milyones nga balor sa financial assistance niadtong Mayo 13.

Ang mga hinabang nga salapi gituyo alang sa mga biktima sa Bagyong Odette (Rai) ug bag-ong mga insidente sa sunog, mga benepisyaryo sa Tabang Alang sa Panginabuhian sa atong Trabahante (Tapat) program, economic stimulus recipients, ug octogenarian beneficiaries.

Matud ni Reyes nga kon dili ma-claim ang financial assistance human sa 10 ka adlaw sukad sa pagsugod sa disbursement, ibalik kini sa panudlanan sa Siyudad ug posibleng ma-forfeit.

Apan aduna pay kahigayonan nga ang pundo masulod sa bag-ong payroll apan madugay pa kini sa pagproseso una pa ma-claim sa mga benepisyaryo, dugang niya.

Matod ni Reyes, ang mga opisiyal sa City Hall nibisita sa lainlaing mga barangay sukad sa pagsugod sa distribution aron kini maabot sa mga benepisyaryo.

“Nganong dili man nila ma claim, nga supposed to be naa man sila sa ilang barangay... gi-adto na sila for pila ka days,” matod ni Reyes.

Si Reyes niingon nga ang modawat kinahanglan na nga moadto sa Cebu City Finance Center nga nahimutang sa City Hall aron ma-claim ang cash aid.

Ang pag-apod-apod sa hinabang pinansyal ka usa nahunong tungod sa pagdili sa Commission on Elections (Comelec) sa paggasto sa pundo sa publiko gikan sa Marso 25 hangtod Mayo 8.

Niadtong Biyernes, Mayo 13, ang Siyudad nihatag sa financial aid sa mga barangay sa Dakbayan sa Sugbo.