Komunidad batok dengue

Human sa mga kapin sa duha ka tuig nga minos kaayo ang mga kaso sa dengue fever, karon nisulbong kini og maayo ngadto sa 1,000 percent sa dakbayan sa Sugbo. Kon kuyaw ang coronavirus disease 2019 (Covid-19), kuyaw sab gihapon ang dengue kay sagad nangaigo ani mga bata nga wa pay immunity sa upat ka strains niini.

Maayo gani kay ang Covid-19 naa nay bakuna, ang dengue fever wa pa gyud. Kon naa sa abroad, wa pay bisan usa ka matang sa bakuna dinhi sa Pilipinas nga pangbatok sa dengue. Ang mga lamok mangitlog sa tubig ug mao ni nga dunay mga nguyo-nguyo nga makit-an kon di malimpyuhan ang mga lim-aw ug uban pa nga mahimong mapundohan og tubig.

Ang pagpuo o paglimita sa pagpanaghan sa mga lamok nag-agad sa kadaghanon usab sa mga dapit nga mapundohan og tubig. Dunay mga kanal nga di makaagas ug nabiyaan nga mga butang nga napundohan sa tubig sa mga komunidad.

Kini nga mga dapit naa ra sa mga palibot sa kabalayan. Gikinahanglan pa ba nga maghuwat ang katawhan sa kagamhanan aron manglimpyo sa palibot? Ang matag komunidad mahimo man nga mohimo og aksiyon nga di na magpaabot sa local government unit (LGU) ug barangay officials aron mapugngan o ma limit ang gidaghanon sa mga lamok.

Susiha ang mga gamit, sama sa baso nga nalimtan paglimpyo ug naa lang sa suok. Mga ligid sa sakyanan nga gipasagdan apan napundohan og tubig. Mga sudlanan sa tubig nga dunay sulod, apan napundo na og pipila ka mga adlaw. Kini maoy pipila ka paboritong itluganan sa mga lamok, labina sa nagdala og sakit nga dengue nga anha mopuyo sa limpyo nga tubig.

Ang kaluwasan sa imong gipuy-an wala sa mga kamot sa mga public official, kon di naa kanimo. Ang pagsumpo sa mga lamok nga nagdala aning sakita nag-agad sa aksiyon sa matag usa ug panagtambayong sa komunidad sa kinatibuk-an.

Namatud-an na man nga ang pagpanglimpyo maoy epektibong hinagiban batok sa dengue.