Mga sagbot sa utok

ALCEA MANINGO Cangyan, Carmen, Cebu

Pagkahumag pamahaw sa magtiayong Rudy ug Mira, nilingkod si Rudy sa sopa sa ilang sala. Gipasalida ang telebisiyon. Nanukhi. Gipangtutho niya iyang mga kiki sa sinaw nga sawog nga tayls. Gisilhig ni Mira ang mga kiki. Napikal si Rudy sa kalimpyada ni Mira.

“Bida! Kanang imong kalimpyada insulto na man na nako! Pasagdahi lang na akong mga tinutho nga kiki. Lugos man na makita. Kan-on ra man na sa mga tiki ug taluto,” ni Rudy.

“Pasagdi ko nga manglimpiyo. Di man ko kapugong nimo nga maghugaw-hugaw.

Sundon ko na lang og limpiyo ang imong hugaw,” ni Mira nga nagmugtok ang nawong.

Sila na man lamang duha sa ilang balay. Iyahay na lag bantay sa sipyat sa usag-usa. Si Rudy retirado nga abogado. May pensiyon sa SSS. Si Mira retirada nga maestra. Giabagan sila sa sa ilang duha ka anak nga sila si Myrna ug Maricor nga puro na minyo, sa gastuhan sa gi-mintin nilang mga tambal. Lingawlingaw na lang ilang bisyo uban sa mga klasmeyt ni Mira sa hayskol. Hapit kada Sabado manuroy sila sa lainlaing beach resort sa Sugbo.

Sa ilang lakawlakaw di malikayan ni Rudy nga maghisgot sa Bibliya ug relihiyon. kay nagtubo man siya sa pagtulon-an sa Diyos. Suphon kanunay si Rudy ni Mira nga pahilumon.

”Puro na man god ta mga senyor sitisen. Di madugay moatubang na ta sa atong magbubuhat. Kitang tawo naglingaw-lingaw. Pero ang

pangutana, nalingaw ba ang Diyos nato?” mao ni isulti ni Rudy sa di pa mohilom.

“Nahimuot ba ang Diyos sa imong kalimpyada?” sukot ni Rudy dalang sukmat.

“Oo. Wa diay ka anang panultihon nga ‘Cleanliness is next to Godliness’ ?” ni Mira nga nagsugod pag-trapo sa sawog ginamit ang ‘floor mop.”

“Dili man importante ang kalimpiyo sa balay. Ang importante mao ang kalimpiyo sa utok?” ni Rudy.

”Ngano? Unsa may sulod sa akong utok? Uk-ok? Bakukang? O Balagtok?” ni Mira nga pinabundak ang mga pulong.

“Gikan sa atong katigulangan, ang namat-an natog kahayag mao ang mga bakak nga pagtulon-an sa Diyos ug relihiyon. Mao ni mipilit sa atong utok sukad kaniadto hangtod karon. Maong mibasa kog Bibliya aron silhigan ang akong utok sa mga sayop ug bakak nga kaalam,” ni Rudy. Gipalong niya ang TV.

“Mas suheto pa diay ka karon kaysa mga pastor ug mga pari nga mga gradwado sa seminaryo?” ni Mira nga miurong pagtrapo sa salog ug nanighawak.

“Ang mga seminaryo o Bible college, mga Dr. of Philosophy o Dr. of Theology wala magtuon sa kamatuoran ni Hesukristo. Mao ni ang pulong ni Hesus: The truth shall set you free. Apan wa nila hatagig bili,” ni Rudy.

“Unsay buot nimo ipasabot?” ni Mira. Mibira og plastik nga lingkuranan ug milingkod.

“Ang angay isangyaw sa tanang pari, pastor o ministro, ang kamatuoran sa pagkakaron.

Dili ang kaniadto nga dili na tinuod,” ni Rudy.

“Sama sa unsa man pananglitan?” ni Mira.

“Si Jesus human na malansang sa krus, namatay, nabanhaw ug misaka na sa langit. Wala na siya sa sabakan ni Maria. Si Maria dili na birhen. Human ikahimugso si Jesus, gipanganak ni Maria si James nga anak nilang Joseph, bana ni Maria. Si Jesus dili na bata nga paga-ampoan isip Santo Nino. Si Jesus dili itom nga paga-ampoan isip Black Nazarene. Si Jesus natangtang na sa krus. Dili na siya angay ampuan isip patay nga anak sa Diyos. Nabanhaw na siya; tua na sa langit. Mao ni angay silhigon sa imong utok, mga sagbot nga pagtulon-an nga gipatulon sa atong katigulangan kanato,” ni Rudy.

Nanghupaw si Mira unya misulti, “Unsa man gyuy gusto nimong mahitabo?” “Akong gusto mahitabo nga ang tawo makat-on sa kamatuoran sa pulong ni Jesus aron makab-ot ang kagawasan sa COVID-19 pandemic. Kay ang kamatuoran maghatag man og kagawasan,” ni Rudy.

(KATAPUSAN)