Tinun-an sa nursing gidayeg sa kapulisan

Gipapangita ni Police Colonel Ireneo Dalogdog, hepe sa Cebu City Police Office (CCP), ang tinun-an sa kursong nursing nga nitabang sa pag-atiman kang Bernadeta Zamora human abisa ang liog niini sa suspek nga iyang kapuyo nga si Edwin Salazar Lumacad.

Matud ni Dalogdog, nakadayeg siya sa mabayanihong buhat sa tinun-an nga wala mobiya ug nisap-ong sa samad sa liog sa biktima aron dili moagas ang daghang dugo.

Gitinguha nila nga sa Lunes, Pebrero 6, 2023, atol sa flag raising ceremony, mahatagan og pasidungog ang maong tinun-an aron maila usab ang iyang gihimo.

“Isip usa ka student, iyaha nang na-practice ang pagka public servant nga in times of trouble, labinag naa sa himatayon ang kadtong tawo, wala gyud siya magduha-duha sa pagtabang. So, atong mga ugali sa mga Pilipino ba nga ato gyud na appreciate tungod sa pagka matinabangon,” matud ni Dalogdog.

Sa impormasyon nga nakuha sa CCPO director, nagtungha sa usa ka dakong unibersidad sa dakbayan sa Sugbo ang maong tinun-an.

Duna nay inisyal nga ngalan si Dalogdog nga tungod niini iyang gimandoan ang hepe sa Waterfront Police Station nga pangitaon kini aron pahibaw-on labot sa ilang paghatag sa pasidungog.

Usa ka plaque of appreciation ug i-recognize sa CCPO ug himuong ehemplo tungod sa gipakita niining kinaiya nga mao ang pag-una sa pagluwas sa kinabuhi sa laing tawo.

Nanghinaot ang CCPO official nga sundon sa ubang mga tawo ang gihimo sa tinun-an nga dili magpanuko sa pagtabang sa nanginahanglan.

Gikiha og frustrated murder in relation sa Republic Act (RA) 9262 kun Violence Against Women and Children Act si Lumacad.

Matud ni Police Major Henry Orbiso, hepe sa Waterfront Police Station, nga niarang-arang na ang kahimtang sa biktima human sila gipahibawo sa kabanay niini nga molihok na si Bernadeta.