3 ka prov. hospitals pasado; Garcia mihatag og ‘mando’

Gihatagan ni Cebu Governor Gwendolyn ‘Gwen’ Garcia og 60 ka adlaw ang tanang provincial ug district hospitals nga mopalambo sa ilang pasilidad ug serbisyo sa mga pasyente.

Kini ang mando ni Garcia sa mga opisyal sa mga ospital nga gidumala sa Probinsya sa Sugbo subay sa giluwatang resulta sa tulo ka mga buwan nga evaluation sa hospital monitoring team sa Kapitolyo nga gipangulohan ni Dr. Mary Jean Loreche, Capitol health consultant, ug si Provincial Board member Stanley Caminero nga nangulo sa committee on health.

Ginganlan nga top performing hospitals sa probinsya sa Sugbo ang Balamban Provincial Hospital, Carcar Provincial Hospital, ug Ricardo Maningo District Hospital sa San Francisco, lungsod sa Camotes human makakuha og 5.0 nga rating sa 5.0 nga grado.

Nalakip sa maayong practices nga gipasidunggan sa mga top performers ang pagkaon sa mga pasyente, kalimpyo, pag maximize sa mga ekipo ug sa healthcare workers ingon man ang paspas nga pag-irog sa linya sa mga pasyente.

Gawas sa tulo, nakakuha og 4.8 nga grado ang Tuburan district hospital; 4.8 usab ang grado sa Minglanilla District Hospital; 4.6 sa Oslob District

Hospital; 4.3 alang sa Malabuyoc District Hospital; 4.3 sa Badian District Hospital; 4.2 alang sa Argao District Hospital; 3.5 alang sa Sogod District Hospital; ug 3.4 alang Pinamungajan District Hospital.

Sa maong ranking, nakakuha sa labing ubos nga grado ang Danao Provincial Hospital nga anaay 3.0 sa kinatibuk-ang 5.0 sa overall performance ug services nga maoy pipila sa gihatagan og pagtagad sa evaluation.

Si Loreche nagkanayon nga ang evaluation gisugdan niadtong Septiyembre 2022 diin pipila sa criteria niini ang hospital infrastructure, leadership ug management, client satisfaction, economics ug uban pa.

“It’s really more on operations,” matud ni Loreche.

Bisan pa og nakakuha og dagkong grado ang ubang mga hospitals, gidugang ni Loreche nga daghan pa ang angay nga ipalambo sa hospitals tungod kay dunay mga butang nga wala na nila maatiman.

“Although we gave them a perfect score, that’s on leadership and management. There are things man gud that are beyond their control,” dugang ni Loreche.

Subay niini, gimandoan ni Garcia ang tanang mga pangu sa hospitals sa pagpalambo sa ilang serbisyo base usab sa assessment.

“I have given them 60 days to address the concerns, to follow them. By the end of 60 days, we will schedule another round of inspection by the team,” matud ni Garcia sa mga tigbalita sa Enero 31, 2023.