Castillo: Dunay kabalhinan sa namuyo sa easement zone

Tanang mapahawa nga pamilya nga nagpuyo sulod sa 3-meter easement sa dagkong mga agianan sa tubig sa dakbayan sa Sugbo makaseguro nga maapil sa mga programa sa pabalay o housing sa dakbayan.

Si Atty. Jerone Castillo, kaabag ni Mayor Michael Rama alang sa mga espisyal nga proyekto, niingon sa Martes, Enero 31, 2023, nga adunay dul-an sa 4,000 ka mga pamilya ang kinahanglan nga ibalhin sa paglimpiyo sa easement zone.

Matud ni Castillo nga ang datos resulta sa ilang pag-tag sa mga istruktura nga gitukod sulod sa tulo ka metros nga easement sa walo ka dagkong mga agianan sa tubig sa siyudad.

Dili na mabalaka ang mga pamilya nga hapit na pabakwiton tungod kay nangandam ang City Government og nagkalainlaing housing projects nga ilang mapahimuslan, dugang niya.

Mahimo kini sa porma sa housing loan pinaagi sa PAGIBIG Fund sa gobiyerno o pagavail sa socialized housing program sa City Government.

Matud ni Castillo, atol sa pag-tag sa mga istruktura ug profiling sa mga nagpuyo, ilang nahibaw-an nga dunay mga residente nga adunay binuwan nga kita nga mokabat sa P50,000.

“So it was surprising nga naa sila nagpuyo sa atoang three-meter easement kon naa silay capacity nga mopalit (housing) units,” matud ni Castillo.

Alang sa mga dili makasarang sa pag-angkon sa ilang kaugalingon nga balay, ang Siyudad mohatag kanila og prayoridad sa hapit na matukod nga medium-rise building (MRBs).

Si Atty. Collin Rosell, secretary ni Rama, niingon nga karong tuiga magsugod na ang pagtukod sa MRBs daplin sa waterfront sa Siyudad ilabi na sa South Road Properties (SRP).