4 ka opisyal sa komite nga mohashas sa police colonels, heneral ginganlan

Gihinganlan ni Interior Secretary Benhur Abalos Jr., niadtong Miyerkules, Pebrero 1, 2023, ang upat ka mga personalidad sa fiveman committee nga mosusi sa courtesy resignation sa mga police colonel ug heneral base sa ilang posibleng pagkalambigit sa ilegal nga drugas.

Apil sa five-man committee mao sila si Baguio City Mayor Benjamin Magalong, Philippine National Police (PNP) Chief Rodolfo Azurin, kanhi Defense secretary Gilbert Teodoro Jr. ug retired Major General Isagani Nerez kinsa “naila sa ilang dili kuwestiyonable nga integridad, kredibilidad ug walay buling nga reputasyon.”

Matud ni Abalos nga ang laing miyembro nga mokompleto sa komitiba nagdumili sa pagpaila sa publiko.

Siya niingon nga si Azurin “magpukaw” sa komite sa direksyon niini tungod kay kini nagtumong sa paglimpyo sa han-ay sa kapulisan taliwala sa mga paningkamot sa pagsumpo sa ilegal nga drugas sa nasud.

“Iniscreen na siya at nag-usap kami ng Presidente tungkol dito and it is only but proper since obviously, hindi tinanggap ang kaniyang resignation. He is needed there to stir the committee. He’s in the position to give recent intelligence report, etc.,” matud ni Abalos.

Graduate si Magalong sa Philippine Military Academy (PMA) ug 38 ka tuig na nga nagserbisyo sa organisasyon sa kapulisan.

Gipangulohan niya ang imbestigasyon sa duguong engkwentro sa Mamasapano tali sa Bangsamoro Islamic Freedom Fighters (BIFF) ug mga pulis nga miresulta sa pagpatay sa 44 ka mga trooper sa Special Action Force ug terorista ug eksperto sa bomba sa Malaysia nga si Zulkifli Bin Hir, usa sa mga nag-unang target sa operasyon.

Si Magalong niapil usab sa imbestigasyon sa Senado sa mga ninja-cops, o kadtong mga pulis nga nalambigit sa pag-recycle sa ilegal nga drugas nga nakuha sa pagpahigayon sa mga operasyon pinaagi sa pagbaligya niini pagbalik sa kadalanan niadtong 2019.

Si Teodoro usa ka sibilyan nga nagserbisyo isip kalihim sa Department of National Defense ubos sa administrasyon ni kanhi Presidente Gloria Macapagal-Arroyo.

Nakahuman siya sa abogasiya sa University of the Philippines, nag-una sa 1989 bar exams ug nakakuha og masters in law sa Harvard University. Si Teodoro nagsilbi nga representante sa Unang Distrito sa Tarlac gikan sa 1998 hangtod 2007.

Si Nerez sakop sa PMA Maharlika Class of 1984.

Usa usab siya ka abogado nga nagserbisyo sa lainlaing mga kapasidad sa mga yunit sa Philippine National Police, sama sa Police Anti-Crime Emergency Response ug ang Directorate for Integrated Police Operations, Eastern Mindanao.

Kabahin usab siya sa PNP Special Action Force, Presidential Anti-Organized Crime Task Force, ug PNP Anti-Kidnapping Group.

Niadtong Agusto 2022, si Nerez gitudlo isip undersecretary alang sa Police Affairs sa Office of the Presidential Adviser on Military Affairs (Opama). “Sigurado ko nga kining advisory group magpabiling apolitical sa tibuok proseso sa screening ug sa katapusan silotan lamang ang mga sad-an ug nalambigit sa illegal drugs trade,” matud ni Abalos. Niadtong Enero 4, si Abalos niapelar sa tanang hingpit nga police colonels ug heneral nga mosumiter og courtesy resignation isip kabahin sa pakigbatok sa ilegal nga drugas. Sa 955 ka police colonels ug generals, siya niingon nga 12 ang wala mosumiter sa ilang courtesy resignation apan usa lang ang gikonsiderar nga dili compliant sanglit ang lima retirado na samtang unom gikatakda nga moretiro.

Si Azurin niingon nga ang rason sa nag-inusarang opisyal nga nagdumili sa pagtuman kay “personal nga prerogative.”

Apan si Abalos matud pa nga ang nag-inusarang opisyal nga wala mosumiter sa iyang courtesy resignation imbestigahan pa sa posibleng kalambigitan sa ilegal nga drugas apan walay silot ipahamtang sa dili pagtuman.

Ang PNP chief sa sayo pa niingon nga moabot ngadto sa 10 ka mga police official ang giingong nalambigit sa drug trade.

Iyang gisubli nga magpadayon ang monitoring, imbestigasyon ug case build-up batok sa ubang police personnel gumikan sa gihimong internal cleansing sa organisasyon sa kapulisan. / TPM sa SunStar Philippines