Koordinasyon sa DPWH
Nakugang si Lapu-Lapu City Mayor Junard “Ahong” Chan sa pahibawo sa Mactan Electric Company (Meco) nga mopaumento sila sa bayranan sa kuryente karong Marso. Ang mas nakapabug-at sa dako nang daan nga umento mao ang mga brownout.
Di mominus sa usa ngadto sa duha ka mga oras ang brownout, pahibawo sa Meco.
Mag-antus sa umento sa bayranan unya mag-agwanta sa kada adlaw nga brownout. Doble ang igo.
Ang hinungdan mao ang pagkaputol sa kable sa National Grid Corp. of the Philippines (NGCP) nga gituohan nga aksidenteng naigo sa contractor nga nagtrabaho sa UN Ave. sa Mandaue City.
Tiaw mo na, sa kadanghag sa nagtrabaho, ang Lapu-Lapu City ug lungsod sa Cordova mao ang mag-antus.
Hangtod karon, naa gihapon ning problema sa koordinasyon sa Dept. of Public Works and Highways (DPWH) nga dugay nang gireklamo sa mga local government unit (LGU).
Kanang mag-ayo sila og nasudnong karsada nga sila ra ang nasayod hinungdan nga ang hingtundang LGU makugang na lang kay maoy buthan sa publiko kon kini makamugna og trapiko.
Ang husto unta makig-coordinate sila sa LGU alang sa pag-umol og traffic plan ug information drive.
Ning nahitabo sa kable sa NGCP, kon duna pa sab untay koordinasyon tali sa contractor, DPWH ug LGU sa Mandaue City, hayan wa mahitabo ang pagkaputol sa kable.
Di unta mag-ungaw sa krisis ang mga taga Lapu-Lapu City ug Cordova kon nalikayan pa ang hitabo.
Unta, kada dunay proyekto ang DPWH, sila mopahibawo sa mga LGU ug uban pang mga buhatan nga dunay mga imprastraktura nga naa sa mga karsada aron kalikayan ang mga hitabo nga sama niini.
Gawas gud sa kahasol, duna kini dakong epekto sa negusyo, labina nga naa diha ang dagkong mga industriya sa dakbayan sa Lapu-Lapu, wa pay labot ang Mactan Cebu International Airport (MCIA).
Maayo gani nga imbestigahon kini nga hitabo aron dunay manubag sa ingon di na masubli. Magpanagana ug mahadlok na man kon dunay patubagon sa kaakuhan. Kay di baya yano ang epekto sa hitabo. Gatusan ka libo ang naigo, apil na ang ekonomiya sa Sugbo sa kinatibuk-an.