HORNETS GISUNGAG SA BUCKS
Nimugna og 34 puntos ug 18 ka rebounds si Giannis Antetokounmpo aron agakon paingon sa kadaugan ang host Milwaukee Bucks batok sa Charlotte Hornets, 124-115, kagahapon, Pebrero 1, 2023 (PH time) sa National Basketball Association (NBA).
Ang Bucks, nga ningrehistro sa ikalima nilang sagunson nga kadaugan, ningpahugot sa ilang paggunit sa ikaduhang luna sa Eastern Conference dala ang 3417 nga rekord.
Ning duwaa, nahingpit sa Bucks ang ilang tinguha nga panimalos ngadto sa Hornets, nga wala damhang ningkastigo kanila, 138-109, sa premiro nilang sangka niadtong Enero 6.
Ang 29 puntos nga pagkalubong sa Bucks batok sa Hornets maoy ikaduha nga labing dako nilang nahiaguman sa 2022-23 season.
Ang Hornets, nga nagbitay sa ika-14 nga puwesto sa East dala ang 15-37 nga rekord, grabe nga nakapanghudlat sa mas inilog nga Bucks sa nagunang duha ka quarters.
Gikan sa 64-64 nga panagtabla sa halftime, hinayhinay nga ningbiya ang Bucks hangtod nga nakontrolar nila ang kombati.
“Their record doesn’t give them justice,” matod ni Antetokounmpo kabahin sa Hornets. “They’re a really good team. Or maybe they just play well against us. I don’t know.”
Si Khris Middleton nakatampo og 18 puntos alang sa Bucks bisan gilimitahan pa ang iyang playing minutes tungod kay bag-uhay lang siyang nakabalik gikan sa pagkaangol.
“Right now I’m trying to be as aggressive as I can,” matod ni Middleton. “I know it sounds simple or whatever, but that’s just the mindset I’m trying to come up with, especially with my limited minutes. Hopefully as my minutes keep going (up), I keep the same mindset, because it’s been working.”
Si Jrue Holiday niamot og 15 puntos ug iyang career-high nga 13 ka rebounds alang sa Bucks.
Ang Hornets gipangulohan ni LaMelo Ball pinaagi sa iyang triple-double nga 27 puntos, 11 ka assists ug 10 ka rebounds.
Nidugang og 20 puntos si Terry Rozier, nihatag og 16 puntos si Gordon Hayward, samtang niamot og 15 puntos si Jalen McDaniels 15.