‘Namaligya og spaghetti’ gipusil-patay

Trabahante sa usa ka karaoke bar sa dakbayan sa Mandaue gipusil-patay sa Huwebes sa ala 1:30 sa kaadlawon, Pebrero 2, 2023 sa Quijano compound, Barangay Calamba, dakbayan sa Sugbo.

Ang biktima giila nga si Orlando Ordez, 39, taga Sityo Sampaguita, Barangay Capitol Site.

Matud ni Police Staff Sergeant Leigh Vincent Gonzalve sa Sawang Calero Police Station sa Cebu City Police Office (CCPO), ang biktima naglakaw sa eskinita sa nahisgutang dapit dihang gipusil-patay sa usa ka lalaki nga nagsunod kaniya.

Ang killer daling nisibat human sa pagpusil.

Ang biktima naigo sa iyang bilahan ug ingon man sa bukton nga niresulta sa iyang hinanaling kamatayon.

Ang mga sakop sa Scene of the Crime Operation (Soco) nakakuha og mga bala sa gituohang 9mm nga armas nga gigamit sa gunman.

Sa paghiling sa lawas sa biktima, nakuha sa Soco ang usa ka armas nga duwaan, pusas nga panggwardiya ug wala matino nga kantidad sa kwarta.

Lakip sa nakuha mao ang upat ka tag-as ug duha ka mugbong pakete sa gituohang shabu nga sulod sa belt bag ni Ordez.

Dugang ni Gonzalve nga sa kasamtangan wa pa mailhi ang killer.

Matud pa, ang biktima giingong namaligya og spaghetti, apan sigon sa mga nakakita niya sa dapit, ang iyang baligya gibiyaan lang human walay nipalit.

Dugang ni Gonzalve nga ang biktima nipalit og beer sa usa ka tindahan ug human sa pag-inom, nilakaw dayon gisundan sa gunman ug gipusil.

Ang inahan nga si Merly nahibulong kon nganong niabot sa lugar ang iyang anak, apan nahibaloan niya sa mga tawo sa dapit nga magsige diay og duaw sa lugar ang biktima.