Tanang iro ‘gipamatay’ sulod sa subdivision?

Nagpadayon ang imbestigasyon sa kapulisan sa dakbayan sa Naga kabahin sa gituohang halapad nga pagpanghilo sa mga iro sa usa ka subdivision.

Si Police Lieutenant Colonel Junnel Caadlawon, hepe sa Naga City Police station, nagkanayon nga gisusi nila ang Casa Mira South Subdivision sa Barangay Inuboran gumikan sa nabantayan sa mga residente sa pagpanimaho sa lugar.

Nasuta nga pipila ka mga iro ang nangamatay sa lugar.

Ang Casa Mira South Homeowners Association niluwat og pamahayag nga naalarma sa panghitabo ug wala makauyon sa linuog nga pagpatay sa mga iro.

“The recent incidents of dog poisoning in the premises of our subdivision are alarming. The CMS HO does not and will never support nor condone inhumane methods to control the stray dog population in the community. Not only is this cruel and illegal, but this also puts the health and safety of the homeowners and their pets at risk. Meanwhile, we reach out to members of the Casa Mira Community to be vigilant and patient while we are coordinating with the concerned LGU (local government unit) for the proper and legal handling and management of the stray dogs,” sumala sa pamahayag sa homeowners.

Matud ni Caadlawon, “Ongoing pa atong investigation pero nangayo ko sa mga CCTV footage sa area kay aron somehow makakuha ta og backtrack nganong nahitabo man ning sunodsunod nga nangamatay nga mga iro sa ilang property.

“Base sa pag occular sa nato naay pipila ka mga iro nga naa sa kilid nga nalata na so dili pa nato ma account kay murag wala gyud ni siya magdungan,” dugang niya.

Gibutyag ni Caadlawon nga dili lang mga libud-suroy nga mga iro ang namatay, apan lakip ang mga gipanag-iya sa pipila ka homeowners sa dapit.

Sa Sabado, Pebrero 4, 2023, gikatakdang mohimo og cleanup drive ang kapulisan ug homeowners sa dapit aron malimpyohan ug masusi usab ang uban pa nga areas diin nagpasad ang patay nga mga iro.

Subay niini, giawhag ni Caadlawon ang mga residente sa siyudad nga mahimong responsable nga mga pet owner.

Kon ugaling dunay mga iro nga saag sa dapit, mas maayo usab nga manawag sa LGU aron nga makuha ug maatiman kini ug dili patyon ug yama-yamaan.