2 ka sakyanan pareho og plate numbers, gireklamo
Usa ka babaye nga negusyante nidangop sa Highway Patrol Group (HPG 7 ) human wala dawata sa Land Transportation Office (LTO) ang pagpa-renew sa iyang sakyanan tungod kay dunay kaparehang numero sa plaka nga una nang naka-renew.
Si Cecile Labang, hamtong, naglibog human balibari sa LTO 7 nga ma-renew ang iyang Toyota Avanza nga dunay plate number nga NEU1976 tungod kay dunay kaloha nga plaka.
Matud niya nga napalit niya nga cash ang maong sakyanan sa miaging tuig sa usa ka auto trader sa dalan C. Padilla, dakbayan sa Sugbo ug narehistro nang daaan sa LTO.
“Last year pagpalit nako ani, okay pa, nya karon na nga year nga due for renewal, nahibung na man mi nga giingnan mi sa LTO nga nganong naa man ninyo ang CR ug OR? Ako giingnan nga alangan nga akoa man ni. Wala ko kahibawo diay nga naa nay nisapaw nga name, that’s how we found out nga naay naka clone,” matud ni Labang.
Gipatawag sa HPG 7 ang tag-iya sa laing sakyanan nga naka-clone sa plate number ni Labang ug dinhi nasuta nga usa ra ka dealer ang ilang napalitan.
Sumala sa tag-iya sa laing sakyanan nga si ‘Benie’ nga wala siya nasayod nga naka-clone diay ang iyang napalit.
Matud niya nga sa pagpalit niya sa miaging tuig, kompleto na kini sa papeles ug nakarehistro pa sa LTO nga mo-expire usab karong tuiga.
Diha na lang niya nasayran nga dunay problema ang iyang napalit nga sakyanan atol sa pag-apply niyag RFID kun radio frequency identification alang sa Cebu-Cordova Link Espressway (CCLEX) nga duna kini susama nga plate number hinungdan nga wala siya naaprobahan.
“Nakabawo ko katong pagkuha nako sa CCLEX, pagkuha nako sa RFID nga naay same. Niana man tong LTO nga mo reach out ra daw sila,” matud ni Benie.
DIIN GIKAN
Si Police Colonel Neil Francia, hepe sa HPG 7, nagkanayon nga ang sakyanan ni Benie nga niclone sa plate number ni Labang gikan sa Region 4A base sa nakuhang chassis number niini.
Matud niya nga dako ang posibilidad nga ang nakapalit sa sakyanan ni Benie mihimo og pamaagi aron marehistro ug makakuha og legal nga papeles gikan sa LTO, gipabuhatan kini og dokumento nga gitawag nila og “rebirth” o “born again” diin sa Mindanao lang ang mohimo niini.
Sa nakita ni Francia sa official receipt (OR) ug certificate of registration (CR) sa LTO, narehistro ang usa sa mga sakyanan sa dakbayan sa Dipolog nga hitak ang kurapsyon sa mga kawani sa LTO.
“Siguro para marehistro gipabuhatan, dunay gitawag ani nga re-birth or born again. Kining re-birth mao ning gipabuhatan og bag-ong CR either sa Dipolog, kining Region 9, Sindangan (Zamboanga del Norte). Kining may mga nasa watchlist sa Highway Patrol. So far, dinhi permi ang Dipolog City. Familiar ako kay sa pirma pa lang nahibaw-an ko na kon kinsa ni,” matud ni Francia.
Tambag ni Francia niadtong nagplano nga mopalit og segunda mano nga mga sakyanan nga sa dili pa mohukom nga paliton, ipasusi una kini sa ilang buhatan aron masubay kon wala ba kini problema.
Labina karon nga uso sa online ang pag-deal sa mga sakyanan ug ang mga namaligya dili makapakita sa rehistro sa rason kunohay nga nawala tungod niadtong bagyong Odette.
Niini kinahanglan nga magduda na ang mopalit kay posibling kinawat kini. Gipatawag sa HPG ang auto trader nga maoy gipalitan sa duha ka mga biktima aron masubay kon kinsa ang tag-iya sa usa sa mga sakyanan nga nagdala og clone nga plaka.
Kon mamatud-an nga sad-an ang auto trader, ila kining ikiha ug subayon nila kon pila pa ka mga sakyanan ang ilang na dispose nga didto sa Dipolog City narehistro sanglit dako ang posibilidad nga problemado kini.