Buhi, milapad pang illegal drugs
Grabe kakusog sa kampanya batok sa ilegal nga drugas sa miaging administrasyon ug daghang mga durugista nga giingong nanukol sa mga awtoridad sa anti illegal drug operations nga napatay.
Tungod sa kahadlok, minilyon ka mga tawo nga nangagumon sa ilegal nga drugas ang nagpa rehabilitate nga ubos sa mga programa sa mga barangay. Mokabat sab sa dul-an sa P100 bilyon nga balor sa illegal drugs ang nasakmit sa mga awtoridad.
Bisan gani sa pagsugod sa administrasyong Marcos, duna dayoy labing minos P3 bilyunes nga balor sa illegal drugs ang nasakmit ug dunay mga pulis nga nabisto ang kalambigitan sa gipahigayong mga buy-bust. Wa na masurprisa ang publiko niini tungod kay dugay na mang gidudahan nga dunay mga awtoridad nga nalambigit. Bisan gani ngadto sa taas na og ranggo nga mga opisyal.
Apan makapaalarma sa Sugbo ang suway nga pagpayuhot og illegal drugs gikan sa South Africa kay sinyal kini sa kalambigitan sa lokal nga grupo sa dakong international drug ring.
Di gamay nga grupo ang mosuway sa pagpalusot og 17 ka kilo sa illegal drugs agi sa international airport human kini nakalusot sa duha ka langyaw nga mga tugpahanan gikan sa iyang gigikanan nga giingong dakbayan sa Johannesburg sa South Africa.
Niini, gikinahanglan ang pagpalawom sa imbestigasyon ug pakiglambigit sa mga awtoridad dinhi sa Sugbo sa ilang counterpart sa South Africa.
Hayan dako ang posibilidad nga ang suspek nga nidala sa mga bagahe usa lang ka “mule” nga igo rang gipadala sa illegal drugs, wa siya nasayod o nakaila kinsa ang hatagan.
Mao ni ang naandan nga procedure sa mga sindikato sa illegal drugs nga never ask questions ug ayaw tan-awa ang butang nga gidala bugti sa dakong kantidad nga maoy suhol. Salida sa sine nga nagsundog sa tinud-anay nga kinabuhi.
Ang hitabo nagpakita nga wa magkalawos ang ilegal nga drugas, buhi diay gihapon kaayo bisan sa hugot kaayong kampanya batok niini ug sa pagkamatay sa daghang mga durugista.
Inay malawos, duna man hinuoy miabot og katay sa tugkaran niini nga dako kaayong sindikato.
Nagmatuod lang kini nga ang suliran sa illegal drugs di masumpo sa simple lang nga pinulis nga paagi. Gikinahanglan ang partisipasyon sa tibuok komunidad.
Kay kon duna may mamatay, duna ray andam mopuli niini tungod sa kadako sa kitaon.