8th PHL KiteBoarding Tour sa Bantayan Island
Mahimong sentro sa atraksyon ang kiteboarding sa maparaisong destinasyon sa Sante Fe, Bantayan Island sa umaabot nga mga adlaw.
Ang Philippine Kiteboarding Association (PKA), nga kiteboarding governing body sa nasod, kaabag ang Santa Fe Kiteschool andam na alang sa pagpahigayon sa Philippine Kiteboarding Tour Season 8 karong Pebrero 10-12, 2023 sa matahom nga isla sa Sugbo.
Human sa kalampusan sa kompetisyon sa niaging seasons diin gatusan ka kiteboarders gikan sa nagkalainlaing nasod ang nangapil, ang mga naglaom og laing makapaukyab nga mga askyon ang masaksihan sa bag-ong season.
Ang kompetisyon gibahin sa tulo ka mga kategoriya. Kini mao ang Race, Freestyle, ug Hangtime nga adunay subclassifications nga Novice, Men’s, Women’s, Masters ug Grand Masters.
Ning higayuna, ang organizers nakadesisyon nga ilakip ang hydrofoil kite races sa tinguha nga makadani og daghang mga partisipante gikan sa Asia, Europe ug Americas.
Gawas niini, aduna say free lessons sa kiteboarding, skimboarding, e-foil, ug balance board basics.
Mag-andam sab ang organizers og mga kalingawan sama sa banda atol sa kompetisyon.
“The Santa Fe Kiteschool really pushed for the 3rd leg of the season 8 tour to be held in Santa Fe, Bantayan Island so that participants and the audience can discover that we are not just a summer beach destination but also a must-visit spot for sporting activities,” matod ni event organizer Louie Villacin. “We want to put Santa Fe on the map as one of the best kiteboarding spots in the Philippines.”