Marine radars ipamutang sa Cebu; lakang batok sa drugas

Mga pantalan sa lalawigan sa Sugbo pamutangan og marine radars aron palig-unon ang seguridad sa Sugbo batok sa ilegal nga drugas.

Nakab-ot kini nga desisyon atol sa tigom sa One Cebu Inter-Agency Interdiction Task Force (OCIAITF), diin nakita ang kamahinungdanon sa pagpamutang og marine radars sa mga pantalan gumikan sa risgo nga makasulod ang illegal ug kontrabando nga dili mabantayan.

Atol sa gipatawag nga tigum ni Garcia, gitaho sa mga sakop sa OCIAITF nga dunay mga barko nga mosulod nga dili kompleto ang dokumento.

Pipila usab ang mopalong sa ilang mga Automatic Identification System (AIS) panahon nga mosulod sa kadagatan nga ubos sa hurisdiksyon sa Sugbo aron dili mabantayan.

Matud sa taho sa Sugbo News, media arm sa Kapitolyo, kini paagi usab nga ma

detect dayon ang mga barko nga nagpadulong pa lamang ug modunggo na.

Matud ni Coast Guard Commander, Commodore Luisito Sibayan sa District Central Visayas, nga bisan og palungon ang AIS sa barko, duna gihapo’y mekanismo nga maka detect sa nahimutangan niini.

“That’s a one way to strictly monitor ang mga barko na iyan. So, before entering pag may mga ganyang problema, pwede na rin nating sitahin para mas magampanan natin ng maganda ang trabaho ng ating task force,” asoy ni Sibayan sa samang taho.

Subay niini, gikatakdang moluwat og executive order si Cebu Governor Gwendolyn Garcia nga kini paluyohan sa provincial ordinance nga maglatid sa mga protocol alang sa mga barko nga modunggo sa mga pribado ug pampublikung pantalan sa probinsya.

“The port operators, kahit private operators iyan, need to follow whether or not they follow that. Ito na ang PNP and Coastguard that will see to it that it is strictly followed and any violation will be dealt with,” dugang pa ni Garcia.

Sa sunod semana gikatakda nga moduaw si Garcia sa pantalan ilabi na sa Pier 3 sa dakbayan sa Sugbo aron personal nga susihon ang operations.