Mga drayber, vendor sa merkado ‘maglisod’ sa cashless nga bayad

Pipila ka mga tricycle driver ug vendors sa Lapu-Lapu City Public Market dili ganahan mogamit og cashless transactions o bayad.

Si Anoy Ibarat, 40-anyos nga traysikol drayber nga nagbiyahe gikan sa Barangay Bankal paingon sa Lapu-Lapu City Public Market sa Barangay Poblacion ug vice versa, nitug-an sa SunStar Cebu Pebrero 3, 2023, nga wala siyay cellphone nga magamit kon mobayad ang mga pasahero alang sa pamasahe.

“Dili ko uyon. Maayo rana sa mga dagkong bayranan pero sa ingon-ani nga pamasahiroan, dili,” matud ni Ibarat kinsa nagtrabaho isip tricycle driver sud na sa 15 ka mga tuig.

Si Ibarat niingon nga ang cashless nga mga transaksyon makahatag usab kanila og kahasol tungod kay kadaghanan kanila walay nahibaloan bahin sa digital payments.

Si Mario Moradas, 54-anyos nga traysikol drayber nga susama og rota ni Ibarat, niingon nga medyo nahadlok siya nga mosud sa digital payments.

“Daghan kaayo rong mga storya nga mangawala ang kwarta sa Gcash. Daghang kamao sa binoang ba unya naa pod posibilidad nga kami pod maingon niana nga mawala ang kwarta,” matud ni Moradas, kinsa niingon nga sagad sa mga drayber mabag-uhan niini.

Samtang mas gusto niya ang kwarta isip bayad, gitataw ni Moradas nga mahimo siyang mousab sa iyang hunahuna kon adunay usa ka orientation kon giunsa ang paggamit niini ug nga sila makasiguro sa seguridad.

Si Gertudes Tajanlangit, 61-anyos nga tigbaligya og isda sa merkado publiko sa dakbayan, sa iyang bahin, niingon nga hasol lang ang pagbayad sa cashless.

Si Tajanlangit, niingon nga sagad basa ang iyang mga kamot kay magkupot siya og isda sa matag kustomer nga mopalit.

Gawas pa niana, ang fish vendor sulod na sa kapin sa 20 ka tuig, niingon nga ang paggamit sa cashless payments nagpasabot usab nga kinahanglan nilang ablihan ang ilang mga mobile phone aron ma-verify ang matag transaksyon sa mga kustomer.

“Niini, mahinay mi sa pag-accommodate sa ubang mga kustomer nga naa sa linya,” matud ni Tajanlangit.

Ang Kagamhanan sa Dakbayan sa Lapu-Lapu gikatakdang mopaila sa mga cashless transaction sa mga business establishment ug sektor sa transportasyon sa dakbayan karong Pebrero 17.

Ang maong lakang pakigtambayayong sa Bangko Sentral ng Pilipinas (BSP) ug sa Department of the Interior and Local Government (DILG) isip kabahin sa pagpatuman sa Paleng-QR PH Program nga gisagop sa City Government pinaagi sa Ordinance No. 16042-2022.

Sumala sa website sa BSP, ang programa nagtumong sa pagtukod sa digital payments ecosystem sa nasud pinaagi sa pagpasiugda sa cashless payments sa mga merkado publiko ug lokal nga transportasyon, partikular sa mga traysikol.

Ang pagparehistro sa mga merchant ug stakeholders sa koordinasyon sa mga financial service providers mahitabo atol sa paglusad sa programa, nga ipahigayon sa JP Rizal Street duol sa merkado.

Ang mga service provider naglakip sa mga bangko ug electronic money issuer sama sa GCash, PayMaya, ug StarPay.

Ubos sa giaprobahan nga ordinansa sa Dakbayan sa Lapu-Lapu, ang mga establisemento sa negosyo, lakip ang mga tindera sa merkado, mga tindera sa komunidad, ug mga traysikol, gimandoan sa pagpadayon ug paghatag sa ilang mga suki, kustomer, pumapalit, pasahero ug kliyente nga kapilian sa pagbayad pinaagi sa digital o alternatibong paagi sa pagbayad .

Gipangamahanan ni City Councilor Annabeth Cuizon ug co-authored ni Konsehal Climaco Tatoy Jr., ang ordinansa, hinuon, niklaro nga walay nagdili sa pagbayad sa cash kon pilion sa mga kliyente.

Sa dili pa ang paglusad sa programa, ang City Government mopahigayon og information drive ug magdasig sa mga tigbaligya og financial literacy market ug mga drayber sa pampublikong transportasyon bahin sa inisyatiba. / MKG