Donaire-Casimero titlefight haom na gyud unta

Anaa na man tuod siya, sa maingon nato, nga talisalop nga edad sa iyang karera, apan dili halayo nga mamahimo gihapon siyang world boxing champion sa umaabot nga mga adlaw.

Buot nakong ipasabot kini si Nonito “The Filipino Flash” Donaire Jr. kinsa anaa na sa iyang pangidaron nga 40-anyos.

Bisan pa man niini daw og sa gikahadlokan lang gihapon siya sa iyang mga katimbang.

Si Donaire, gikatakda unta nga moaway ni Jason Moloney sa Australia alang sa World Boxing Council (WBC) bantamweight title nga gibakantihan sa undisputed world champion nga si Naoya Inoue sa Japan.

Si Inoue, ning bag-o lang, nakadesider nga ibakante ang iyang upat ka titulo sa bantamweight division nga mao ang World Boxing Council (WBC), International Boxing Federation (IBF), World Boxing Organization (WBO) ug World Boxing Association (WBA) aron mosaka sa super-bantamweight division.

Apan unsa mang pagkaunsaa nga miatras man ang kampo ni Moloney ug ang promoter niini nga mao ang Top Rank ni Bob Arum.

Dili gusto si Arum nga makig negotiate sa Probellum nga maoy nag-promote ni Donaire kay kuno kini gipanag-iya og suspected criminal. Siguro duna siyay kaligutgot o bati nga eksperiyensiya sa Probellum.

Target karon ni Arum ug ni Moloney mao ang laing boxing bodies nga nabakantihan usab ni Inoue - ang WBA, IBF o sa WBO.

Niini maglisod karon ang WBC pagpangita og makontra ni Donaire alang sa world title fight tungod kay sagad sa mga strong contenders sa ilang bantamweight division ubos man sa pagdumala sa Top Rank Promotions.

Kini sama sa mga Pinoy fighters nga sila si Vincent Astrolabio ug Reymart Santiago ug ang Puerto Rican nga si Emmanuel Rodriguez. Hinuon, dunay Mexicano nga gilantawan karon nga maoy ikontra ni Donaire.

Pero ang usa sa makapaikag gyud unta kaayo ug gipangayo sa mga boxing aficionados, (nga labing siguro, mopatok sa takilya o mahimong blockbuster fight) mao ang away batok ni Johnreil Casimero.

Nindot ni nga panagsangka kay adunay history kining duha ug wa na kaayo kinahanglana ang media hype.

Kon gusto gyud ni Donaire nga mokulit og kasaysayan sa boxing di gyud unta siya moatras bisan kinsa pa sama sa iyang gibuhat kaniadto. He should fight among the bests sa iyang division.

Kon ang uban maingon nato nga maglikay-likay ni Donaire, ni Casimero dili gyud siya lihayan.

Apan atong angkonon nga malisod ni nga mahitabo sa pagkakaron tungod kay napapas man ang ngalan ni Casimero sa mga title contenders sa upat ka boxing bodies.

Kay kon namintinar pa sa lumad nga taga Ormoc City ang iyang ranking, mahitabo na gyud unta ang away nga dugay na niyang gipangayo.

We’ll just hope and pray nga mahinayon gyud ni samtang anaa pa nila ang kalantip ug kahanas.