POGOY MIAGAK SA TNT

ng TNT Tropang Giga nipakgang sa suway nga pag-atake sa Magnolia Chicken Templados aron angkunon ang kadaugan, 93-85, sa duwa sa PBA Governor’s Cup sa Ynares Center niadtong Biyernes, Pebrero 3, 2023.

Ang Sugbuanong si RR Pogoy maoy nigilak ug nangulo sa Tropang Giga kinsa nipaarak og 20 puntos ug niduslit sa 8-0 run sa fourth quarter pabor sa TNT nga maoy nakapawong sa nagdilaab nga opensa sa Hotshots.

Ang kadaugan sa TNT maoy nagsilbing panimalos sa ilang kapildehan batok sa NLEX Road Warriors nga ilang sister team.

Ang import sa TNT nga si Jalen Hudson nakatampo usab sa pagsutoy sa ilang team aron biyaan ang Templados ug dako sab og natabang sila si Mikey Williams ug Calvin Oftana sa ilang paglabaw og 16 puntos aron ikulit ang ilang ikatulo nga kadaugan gikan sa upat ka mga duwa.

Si TNT head coach Jojo Lastimosa nagkanayon nga adunay nga inspirational message nga ilang gipaabot aron madasig ang mga players taliwa sa ilang subsob nga duwa.

“There were words that were given to the team even if we lost that game because for the most part against NLEX, we played great basketball,” matod ni Lastimosa.

“Again, the challenge for them today is that even at halftime, I was asking the coaches how we are going to be able to sustain the energy since we are coming off back-to-back games,” dugang sa bag-ong coach sa TNT nga si Lastimosa.

Ang Tropang Giga nisiguro nga dili na masubli ang nahitabo batok sa NLEX diin sila naglabaw og 15 puntos dihang sila napukan niadtong Biyernes.

Ang Templados nakadikit pa sa TNT, 85-83 sa wala pa nibulhot ang TNT pinaagi sa 8-0 run nga gipangulohan ni Pogoy aron hatagan og komportable nga labaw ang iyang team 93-83 sa nahabiling 1:49 sa 4th quarter.

Si Williams niabag og 14 puntos samtang 14 puntos ug 10 ka rebounds ang giabag ni Oftana.

Samtang si Paul Lee ang nangulo sa pilderong Templados pinaagi sa iyang 24 puntos diin ilang gigukod ang TNT gikan sa 82-66 nga labaw sa katapusang kwarter.

Sa pagsuwat niining balita, nagduwa pa ang NLEX batok Phoenix Super LPG ug wala pa masugdi ang panagsangka sa Meralco Bolts ug Blackwater Bossing.

Ipahigayon sugod sa alas 4:30 karong hapon ang panag-abot sa sister teams San Miguel Beermen ug Templados samtang mag-abot sa main game ang Barangay Ginebra Gin Kings ug Rain or Shine Elasto Painters.