LIMA EJECTED
Nagkarambola ang mga magduduwa sa duha ka mga team sa National Basketball Association (NBA) human niulbo ang kagubot nga daw wrestling ang giduwaan inay bola tali sa Minnesota Timberwolves ug Orlando Magic sa Sabado, Pebrero 4, 2023 (RP time).
Gumikan niini, lima ka mga player ang wala makatiwas sa pagduwa kay gipagawas sa korte gumikan sa ilang kalambigitan sa nahitabong kagubot sa uwahing bahin sa 3rd quarter sa duwa nga gidaog sa Orlando, 127-120.
Sa lima nga na-ejected, tulo niini ang Wolves nga silang Austin Rivers, Jaden McDaniels ug Taurean Prince, samtang sa habig sa Magic, silang Mo Bamba ug Jalen Suggs.
Ang unang hinungdan sa kagubot mao silang Wolves guard Austin Rivers ug Magic center Bamba, apan niapil ang ubang mga magduduwa.
Sa replay sa footage, nakita si Rivers sa atubangan sa bench sa Magic sa layong bahin sa korte.
Si Bamba, kinsa gikan sa bench ug base sa video, si Rivers ang unang nisukmag kang Magic center Suggs, nga nibunlot kang Rivers palayo dayon niapil si McDaniels ug Prince sa kaguliyang.
Sa wala pa ang hitabo, nasipyat ni Rivers ang iyang attempt sa three-point area atubangan sa bench sa Magic. Sila si Bamba ug Markel Faultz nakita nga ni-react sa pagkasipyat.
Ang kagubot tali sa lima ka players sa Wolves ug Magic niulbo usa ka gabii human sa sumbagay sulod sa korte nilang Memphis Grizzlies guard Dillon Brooks ug Cleveland Cavaliers guard Donovan Mitchell.
Si Brooks niigo sa itlog ni Mitchell atol sa third quarter niadtong Biyernes hinungdan nga naluko sa korte si Mitchell gumikan sa kasakit.
Ang star guard nibawos kang Brooks pinaagi sa paghapak sa bola ug didto na nagkagubot diin na-busy ang ilang mga kauban sa pag-uwang sa duha ka mga magduduwa.
Ang duha ka mga player na-ejected gikan sa duwa nga gidaug sa Cavaliers, 128-114. Ginganlan ni Mitchell si Brooks nga hugaw og dinuwaan.
Ang NBA nianunsyo sa ilang hukom kagahapong adlawa ug nisuspenso kang Brooks og usa ka duwa samtang nipamulta kang Mitchell og P1.1 milyon kun $20,000 base sa peso-dollar exchange rate.