Screening process sa fun run susihon

Usa ka sakop sa konseho sa Dakbayan sa Sugbo ang nanawagan og imbestigasyon kabahin sa health screening process sa marathon race organizers human sa kalit nga kamatayon sa usa ka runner nga pulis niadtong Dominggo, Pebrero 5, 2023.

Moduso og resolusyon si Konsehal Rey Gealon karong adlawa, Pebrero 6, aron tanawon ang kamatayon ni Patrolman Lee Rodrocks Carbonilla nga niapil og running event.

Gipakita sa mga taho nga si Carbonilla kalit nga nakuyapan samtang nagdagan ug pagkahuman gideklarar nga patay tungod sa Acute Decompensated Heart Failure.

Si Gealon nitug-an sa SunStar Cebu niadtong Dominggo nga iyang isumiter ang resolusyon karong Lunes, Pebrero 7.

Sa iyang resolusyon, ang konsehal nagkanayon nga kinahanglang masayran ang screening process nga gigamit sa organizers alang sa mga partisipante sa lumba.

“Ang trahedya nga insidente nanginahanglan sa pagpangutana bahin sa igo nga proseso sa pag-screen alang sa kahimsog ug kahimsog sa mga partisipante nga makasugakod sa mga kalisud sa ingon nga mga marathon aron mapugngan ang ahat nga pagkawala sa kinabuhi,” tipik sa giandam nga resolusyon ni Gealon.

Buot sab mahibaw-an ni Gealon ang igong tubag sa emergency medical services atol sa lumba.

Ang mga marathon ug triathlons nahimong mas popular nga mga kalihokan sa palakasay ug adunay panginahanglan alang sa lehislasyon nga magkinahanglan sa mga tig-organisar sa paghatag og proteksyon sa mga partisipante sa bisan unsang dili maayo nga medikal nga emerhensya, dugang niya.

Ang konsehal nipadayag usab sa iyang simpatiya ug pahasubo ngadto sa pamilya ni Carbonilla.