DSWD-7 mibalik na sa face-to-face sa 4Ps Family Development Sessions
Dul-an sa tulo ka tuig nga pagpahigayon sa electronic Family Development Session (FDS), ipadayon sa Department of Social Welfare and Development (DSWD) Field Office VII ang face-toface approach sa 2023.
Tungod sa Covid-19 pandemic restrictions, ang DSWD nangita og alternatibong paagi sa paghatod sa lainlaing FDS modules ngadto sa Pantawid Pamilyang Pilipino Program (4Ps) partner-beneficiaries sama sa text messages,
social media posts pinaagi sa DSWD Region VII Facebook page, FDS On-the-Air pinaagi sa partner nga mga estasyon sa telebisyon ug radyo, ug mga printed nga materyales nga gihatod sa ilang tagsa-tagsa ka panimalay.
Sa pagsugod sa face-toface FDS karong tuiga, ang prayoridad nga mga topiko magtinguha sa pagbutang sa pundasyon sa programa alang sa kasamtangan ug bag-ong mga benepisyaryo sa 4Ps.
Kini magtutok sa FDS Transformative Learning Path (FDSTLP) nga maghatag og gibug-aton sa positibo nga mga kausaban sa pamatasan nga gipaabot gikan sa mga benepisyaryo sa 4Ps pinaagi sa tulo ka mga panginahanglan nga nakabase sa pagkat-on nga pakete.
Ang tulo ka learning packages naglakip sa mga titulo: 1. “Pagbabago sa pagdumala sa kinabuhi sa pamilya,” 2. “Pakikipag-ugnayan sa istrukturang panlipunan,” ug 3. “Pangkabuhayan at organisasyon.”
Ang mga topiko maghisgot sa pagkat-on sa mga sukaranan sa programa base sa mga probisyon sa Republic Act 11310, uban ang pagpasiugda sa ilang mga pasalig sa pagsunod sa mga kondisyon sa programa ug sa ilang mga tumong sa pagpalambo sa ilang kaayohan sulod sa pito ka tuig nga operational timeline.
Ang FDS usa sa mga kondisyon sa programa nga nagtigom sa partner-beneficiaries kausa sa usa ka bulan aron hisgutan ang nagkalain-laing mga hisgutanan sa kalamboan.
Tumong niini nga mapalambo ug maangkon ang bag-ong mga kahanas ug kahibalo sa
partner-beneficiaries sa 4Ps sa pagtubag sa ilang mga tahas ug responsibilidad sa mga ginikanan, ilabina sa panglawas ug nutrisyon, edukasyon, proteksyon, ug psychosocial nga panginahanglan sa mga bata; pagpalambo sa positibo nga mga mithi sa pamilya; pagpalig-on sa mga relasyon sa kaminyuon; ug aktibong pagkalungsoranon alang sa paghatag og gahum sa komunidad, ug uban pa.
Ang ubang mga kondisyon sa programa mao ang pagpalista ug pagtambong sa mga bata nga nag-edad og 3-18 anyos sa eskwelahan, pag-deworm sa labing minos kaduha sa usa ka tuig alang sa mga bata nga nag-edad og 1-14 anyos, prenatal ug postnatal
check-up alang sa mga babaye, ug preventive check-up alang sa mga bata nga nag-edad 5 anhos ug ubos.
Base sa balaod, ang mga panimalay mahimong makadawat og P750 alang sa pagsunod sa panglawas ug FDS; ang mga bata nga gi-monitor sa programa sa elementarya makadawat og P300; samtang ang naa sa junior high school, makadawat og P500; ug P700 alang sa mga bata sa senior high school.
Ang cash grants ginakwenta matag buwan samtang ang grant alang sa edukasyon naglangkob lamang sa 10 ka bulan matag tuig sa pagtungha, nga nakabenepisyo sa labing taas nga tulo ka mga bata matag panimalay.
Matag compliant household, makadawat usab og rice subsidy nga P600 kada buwan. Ang 4Ps mao ang nag-unang programa sa gobyerno sa pagwagtang sa kakabus nga namuhunan sa kahimsog, nutrisyon, ug edukasyon sa mga kabus, kwalipikado nga mga panimalay.
Kini, uban ang psycho-social ug educational nga mga sangkap nga gihatag pinaagi sa FDS, nanguna sa mga benepisyaryo sa pagpauswag ug pagpadayon sa kaayohan.