Idlas nga ‘tinubdan’
Maghilak ang adlaw kon walay taho sa dinagko nga taho bahin sa pagkasikop sa pagpahuyot sa gidiling druga sa Sugbo ug ubang bahin sa nasod. Makadayeg kita apan makaduda usab sa pikas bahin. Nganong mga gaway lang gihapin sa sindikato ang nangasikop? Asa ang tinubdan?
Nagkalainlaing units sa kapulisan, sama sa Police Regional Office (PRO 7), kanunay nagtaho sa media bahin sa ilang kalamposan sa kampanya batok sa gidiling drugas.
Nigawas na hinuon nga ang Simultaneous Anti-Criminality Law Enforcement Operations (Sacleo) nga taphaw o ‘pang-accomplishment’ human way nigawas nga ‘nag-unang tinubdan sa druga’ o kaha tiggama niini.
Nahisama sa lumba o padaghanay lang ihap sa nasikop sa Sacleo ug nitaho sa media aron paghagtag og dugang kredibilidad sa ilang operasyon.
Sa Sabado, Pebreo 4, ang Philippine Drug Enforcement Agency (PDEA 7) nakakuha og dul-an sa usa ka milyon pesos nga balor sa shabu sa ronda sa duha ka mga Sityo sa Barangay Tisa, siyudad sa Sugbo.
Hinuon, ang labing dako nga pagkasakmit sa 17 kilos nga gidiling drugas nga nikabat og P120 milyunes gikan sa usa ka South African national nga niabot sa Mactan-Cebu International Airport (MCIA) sa gabii niadtong Pebrero 1, 2023.
Apan dili kadto kalamposan sa kapulisan, tungod sa higpit nga pagsusi sa ahente sa Bureau of Customs (BOC). Ang nasikop ‘dili usab tinubdan’. Segurado nga subayon pa kini uban sa international police.
Usa ka hagit sa lokal nga kapulisan nga makadakop og dagkong personahe sa pagpahyuhot og gidiling drugas o utok sa sindako ug mapresentar sa media.
Nasayod nga lisod ang pagsikop sa maong personahe tungod sa kalawom sa organisasyon. Apan kini undanong resulta sa gubat batok sa gidiling drugas.
Uban sa usab sa paglambo sa edukasyon sa katawhan, kabi na sa mga batan-on, sa epekto sa gidiling drugas sa panglawas o pangutok ug kalambigitan sa krimen.
Busa kaakuhan usab natong tanan sa pagsikop sa idlas nga tinubdan, dili lang kapulisan.