36 PTS. NA LANG ANG KUWANG
LeBron misikit sa all-time scoring record apan Lakers pilde
Nagkinahanglan na lang og 36 puntos si LeBron James aron makaposte og kasaysayan human siya nakapakatap og 27 puntos atol sa pagsulong sa Los Angeles Lakers sa New Orleans Pelicans kagahapon, Pebrero 5,
2023 (PH time) sa National Basketball Association (NBA).
Ang nakaapan lang kay gituhak sa Pelicans ang Lakers, 131-126, nga maoy nakapaus-os sa abaga ni James.
“I just want to win,” matod ni James, kinsa usa ka fourtime MVP. “You know, you play the game the right way and see what happens.”
Sa sunod tahas sa Lakers diin atakon sila sa Oklahoma City Thunder karong Miyerkules (PH time), posible nga mabuak na ni James ang all-time scoring record nga 38,387 nga giposte ni legendary Kareem Abdul-Jabbar niadtong Abril 5, 1984.
Si James nakapundo na og 38,352 puntos sa kinatibuk-an.
“I’m tired as hell,” matud sa 38 anyos nga si James apan nidugang siya, “I’ll be ready to go on Tuesday.”
Nakaposte unta og 12 puntos nga labaw ang Lakers, 84-72, pinaagi sa finger role ni James. Apan human niini, hinayhinay nga ninggukod ang Pelicans hangtod nga natabla nila ang duwa, 108-108, sa sayong bahin sa 4th quarter. Nagpadayon ang kainit sa Pelicans ug nakaposte sila og 114-108 nga labaw sa nahabiling 9:07 minutos pinaagi sa duha ka sunodsunod nga three-point bombs ni Trey Murphy. Natabla sa Lakers ang kombati, 116116, sa nahabiling 6:45 minutos. Human niini, grabe na kasikit ang panagsangka ug sa himatyong mga segundos na nakadistansya ang Pelicans alang sa lima ka mga puntos nga kadaugan.
Ang Lakers, nga nahagsa sa ika-13 nga puwesto sa Western Conference dala ang 25-29 nga rekord, gipangulohan ni Anthony Davis pinaagi sa iyang 34 puntos ug 14 rebounds samtang nidugang og 15 puntos si Russell Westbrook. Ang Pelicans gipangulohan sa kanhi Laker nga si Brandon Ingram pinaagi sa iyang 35 puntos, nitampo og 23 puntos si CJ McCollum samtang nihatag og 21 puntos si Murphy. Ningsaka ang Pelicans sa 2727 nga rekord, ika-10 sa Western Conference.*/