Buhatan alang sa habalhabal tukoron
Usa ka buhatan nga mag-regulate sa operasyon sa habalhabal o motorcycle-for-hire, pagatukoron sa dakbayan sa Sugbo.
Kini human nipagawas si Cebu City Mayor Michael Rama og Executive Order No. 8 Series of 2023 nga nagmando sa pagmugna sa Cebu City Habalhabal Drivers’ Coordinating Office (CCHCO).
Ang EO gipirmahan sa mayor niadtong Mayo 23, 2023.
Ang EO magamit sa tanang habalhabal drivers nga residente ug rehistradong botante sa dakbayan sa Sugbo.
Ang Seksyon 5 sa EO naglatid sa mga gimbuhaton sa opisina, lakip ang:
○ Paghimo og database sa tanang habal-habal drivers sa Dakbayan sa Sugbo;
○ Pagpahigayon og awareness seminars ug information campaigns kalabot sa road safety, katungod, ug obligasyon sa mga habalhabal driver;
○ Pagtukod og mga kalambigitan sa nagkalainlaing asosasyon sa mga drayber sa habalhabal;
○ Aron makig-alayon sa Cebu City Transportation Office (CCTO) kalabot sa mga butang nga naglambigit sa designation sa mga rota ug terminal sa mga habalhabal driver;
○ Pag-facilitate ug pagtabang sa barangay ug/o grassroots habalhabal associations; ug
○ Ang ubang mga butang kinahanglan nga tukma aron mapatuman ang mga gimbuhaton sa CCHCO.
Ang CCHCO adunay labing taas nga lima ka mga empleyado, gawas kon adunay kinahanglang dugangan sila, sumala sa EO.
Ang CCHCO gilangkuban sa usa ka executive director nga maoy modumala sa inadlaw-adlaw nga operasyon sa buhatan; administrative officer nga maoy modumala sa consolidation sa mga datos kalabot sa mga akreditadong habalhabal drivers sa dakbayan; ug administrative assistant nga motabang sa administrative officer.
Ang EO moepekto dayon gikan sa petsa sa pagpirma niini ug magpabiling epektibo hangtod nga kini bakwion.