Konsultaha ang habalhabal drivers

Duna nay balaudnon nga gituki sa Senado aron himuon nga legal ang habalhabal nga sa mga tulo na ka dekada nahimong publikong mga sakyanan sa hilit nga mga dapit hangtod nga nauso sa mga metropolitan sa Pilipinas nga nag-antos sa kahuot sa trapiko.

Sa dakbayan sa Sugbo, hapit ang tanang mga eskina sa kadalanan dunay mga grupo sa habalhabal nga naghuwat og mga pasahero.

Bisan ilegal, sila gipasagdan sa kagamhanan kay kon sila wagtangon, daghan ang maapektuhan, mga drayber ug mga pasahero, nga pulos nagsalig ning mao nga matang sa transportasyon. Ang mga drayber nagbuhi sa ilang mga pamilya samtang ang mga pasahero nagdali sa ilang mga trabaho.

Uyon man tuod sila sa balaudnon, apan nabalaka ang ubang mga rider nga kontrolahon sa mga ride hailing operators ang ilang oras ug lugar nga biyahian nga mao unyay makaapekto sa ilang pagpamasahero nga mosangko ngadto sa pagkaapeke sa ilang income.

Ang hearing sa Senado ingon sa nakasentro sa mga ride hailing operator, wa sa liboan ka mga habalhabal organization sa nasod nga angay unta ilakip sa mga konsultasyon. Maayo unta kon ang mga organisasyon sa mga rider dunay payong nga organisasyon aron mas molig-on ang ilang tingog ug madungog.

Samtang maanindot ang katuyoan sa balaod kay seguradong ang mga drayber nga dunay lisensya lang ang makapamasahero, mag-unsa na lang ang kabos nga mga rider nga way ikaparehistro sa ilang mga motorsiklo, labaw na ang pagkuha og lisensya.

Maayo usab ning i-address ang mao nga problema aron di makulban sa panginabuhi ang liboan ka mga pamilya nga nagsalig sa ilang panginabuhi sa pagmaneho og habalhabal sa kabukiran sa nasod.

Mas maayong paminawon ang sektor sa ordinaryong mga rider sa di pa aprobahan ang mao nga balaod nga gitumong tuod sa kaluwasan, apan ang mga adunahang operator mao gihapon ang makapahimulos sa singot sa ordinaryong mga tawo.