Opisyal gisuspenso kay reservoir gipahubsan aron cell phone makuha

New Delhi- Usa ka opisyal sa gobyerno sa India gisuspenso sa iyang trabaho human siya nimando sa pagpahubas sa usa ka water reservoir aron makuha niya ang iyang smartphone nga iyang nahulog samtang nag-selfie.

Nahulog ni food inspector Rajesh Vishwas ang iyang Samsung nga smartphone sa Kherkatta dam sa sentral nga estado sa India sa Chhattisgarh sa miaging semana, taho sa mantalaang The Times of India.

Una nga gihangyo ni Vishwas ang mga lokal nga diver nga sawmon ang reservoir aron pangitaon ang gadget, nga giingon nga adunay sulod nga sensitibo nga datos sa gobyerno.

Apan human napakyas ang unang mga paningkamot sa pagkuha sa iyang smartphone, iyang gihangyo nga haw-asan ang reservoir gamit ang diesel pumps.

Sa misunod nga tulo ka adlaw, kapin sa 2 ka milyon ka litro nga tubig ang gibomba gikan sa reservoir, nga igo na nga makapatubig sa labing menos 1,500 ka ektarya nga yuta sa panahon sa ting-init sa India, ang lokal nga media nagtaho.

Sa mga video nga nag-viral sa social media, si Vishwas nakita nga naglingkod ilawom sa pula nga payong samtang ang mga bomba sa diesel nag-andar aron mahubas ang tubig gikan sa reservoir.

Nisulti si Vishwas sa lokal nga media nga ang tubig sa reservoir dili magamit alang sa irigasyon ug nga nakadawat siya og pagtugot gikan sa usa ka taas nga opisyal nga pahubsan kini.

Ang smartphone sa kadugayan nakuha apan wala na moandar kay nasudlan og tubig.

Sa kaulahian si Vishwas gisuspenso sa mga awtoridad human siya gisaway sa kadaghanan tungod sa pag-usik sa mga tinubdan sa tubig.

Ang India mao ang usa sa mga nasod nga labing nastress sa tubig ug ang grabe nga temperatura misangpot sa grabe nga kanihit sa tubig, hinungdan sa pagkadaot sa mga tanom, sunog sa kalasangan ug pagkaputol sa supply sa kuryente.