47 KA TINUN-AN NALANAG KAY TAWAS NASAGOL SA MARUYA
Ang kinaham nga Pinoy snacks nga saging maruya maoy naka-ingon nga 47 ka mga estudyante sa lungsod sa M’lang, North Cotabato gidali og dala sa tambalanan niadtong Mayo 25, 2023 human sila ningkaon sa ilang pinalit nga maruya.
Ang saging maruya kun banana fritters, ginama sa saging sab-a nga giputos sa batter o flour mixture nga giluto pinaagi sa deep fry dayon gibudburan sa white sugar.
Apan ang maruya nga nakaon sa mga biktima inay asukar, ang gibutang dinugmok nga tawas nga maoy nabutang sa nagluto.
Taho sa Teleradyo, naukay ang usa ka tunghaan sa M’lang, Cotabato sa dihang ang kapin sa 40 ka mga tinun-an pulos nakasinati og grabeng pagpanakit sa ilang tiyan, ang uban nagsuka human ningkaon sa maruya.
NASAYPAN
“Itong vendor kasi ng school, senior citizen. Noong nag-grocery siya para bumili nung white sugar para sa kaniyang ititindang maruya, imbes na yun ang kukuhanin niya doon sa estante ay white sugar, doon pala siya napunta sa lalagyan
ng alum...itong tawas,” asoy ni Dr. Jun Sotea, Municipal Health Officer sa M’Lang, Cotabato human nahinabi ni Noli de Castro sa TeleRadyo.
Gibasol sab ang tagdumala sa grocery store diin nipalit og asukar ang vendor tungod kay way label o ngalan sa produkto, hinungdan nga wa nakabantay ang mipalit nga tawas diay ang iyang napunit sa estante, inay white sugar.
“Hindi niya (vendor) talaga alam na tawas pala yun hanggang sa pagluto niya kinaumagahan, hanggang sa nakain ng mga bata,” dugang pa ni Dr. Sotea.
NALANAG
Naalarma ang municipal health office sa dihang nasayran ang insedente human miabot sa 47 ka mga estudyante ang gikatahong na-food poison.
Moabot sa 15 ka mga biktima ang nagsuka-suka ug grabeng panakit sa ilang tiyan ug gidala sa ospital.
Samtang ang uban wa magrabehan kay wa nila tiwasa og kaon sa dihang nakabantay nga lain og timpla ang maruya.
“Yung tawas naman hindi naman toxic, milder lang ang symptoms,” pasabot ni Dr. Sotea. Matod pa nga overnight lang ang pag-admit sa mga biktima tungod kay miarang-arang na ang ilang kahimtang pagkasunod adlaw.
Atol niining pagsuwat, wa pa masayri kon unsay aksiyon nga gihimo batok sa senior citizen nga vendor. /