JERUSALEM KUWANGAN OG TULOG
Gibutyag sa trainer ni Melvin Jerusalem nga si Michael Domingo nga kuwangan og katulog ang iyang batos ug usa kini sa iyang nakitang hinungdan nga nisurender ang gitawag og “Gringo” human sa 7th round atol sa labing unang pagdepensa niini sa World Boxing Organization (WBO) minimumweight title batok kang Puerto Rican Oscar Collazo niadtong Dominggo, Mayo 28, 2023 (PH time) sa Indio, California.
Sa interbyu sa Superbalita Cebu sa Messenger, nagkanayon si Domingo nga gikan sa ilang paghiabot sa United States – 10 ka mga adlaw sa wala pa ang away – adunay mga gabii nga maglisod pagkatulog si Jerusalem nga gituohang epekto sa jet lag. Mao pa lang kini ang labing unang away ni Jerusalem sa United States.
Gitataw ni Domingo nga nigrabe ang iyang kabalaka dihang naglisod na sab pagkatulog si Jerusalem sa bisperas na mismo sa away.
“Nalipay na unta ko kay mura’g na-energize siya pagkahuman sa weigh-in kay nakakaon na man siya’g sakto. Pero pagkagabii, naglisod na man siya’g katulog. Sige siya’g mata-mata,” matod ni Domingo.
“Importante kaayo sa boxer nga sakto og katulog maong nabalaka na ko ato.”
Gipasabot ni Domingo nga wala lang niya sultii si Jerusalem kabahin sa iyang gibati aron dili maus-os ang morale niini.
Apan ang tanan niresulta atol na sa mismo sa away, matod ni Domingo.
Atol sa away, matod ni Domingo, nga gisultihan siya ni Jerusalem nga namuypoy ang tiil niini hinungdan nga wala nakalihok og sakto.
“Naigo siya permi og body shots kay dili man siya makalihok og sakto. Ako siyang gipangutana human sa 7th round, nibalibad na siya. Dili na niya kaya,” matod ni Domingo.
Hinuon taliwala sa nasinati ni Jerusalem, nagkanayon si Domingo nga ang Japanese promoters sa kanhi ALA fighter nga mao ang magtiayong sila si Nobuyuki ug Marivic Matsuura mipasalig nga mohimo og lakang aron makaaway pagbalik og world title ang lumad nga taga Bukidnon.
“Wala sila magtuo nga mao to ang mahitabo. Nakita nila nga dili ing-ato ang away ni Melvin,” matod ni Domingo.
Si Jerusalem adunay 20-3, 12 KOs nga rekord.