ADLAW SA PAGHUKOM
Mosuway pagkulit og kasaysayan ang Boston Celtics sa ilang pag-host sa Miami Heat sa deciding Game 7 sa Eastern Conference finals series sa National Basketball Association (NBA) ning Martes, Mayo 30, 2023, sa alas 8:30 sa buntag. (PH time).
Kon modaog ang Celtics ning kombatiha, hayan sila ang labing unang team sa kasaysayan nga hingpit nga makabangon gikan sa 0-3 nga biya sa best-of-seven series.
Ang Celtics mao pa lang ang ikaupat nga team nga nalubong og 0-3 sa series apan nakapugos og Game 7.
Ang nag-unang tulo mao ang 1951 New York Knicks, 1994 Denver Nuggets ug 2003 Portland Trail Blazers, nga pulos napakyas
sa Game 7 sulod sa balwarte sa ilang tagsa-tagsa ka kontra.
Ning higayuna, mausab kaha ang resulta? Hayag ang posibilidad gumikan kay sa korte man sa Celtics kombatihon ang tinagakay nga duwa.
“We’ve got another chance,
another opportunity,” matod sa usa sa mga pambato sa Celtics nga si Jayson Tatum, kinsa nagpakatap og 31 puntos sa makapaukyab nga kadaugan sa Celtics sa Game 6, 104-103, nga nadesisyunan sa buzzer-beating putback ni Derrick White.
Ning maong playoffs, ang Celtics sulod na sa lima ka mga duwa nga nakalikay sa kuhit sa panamilit. Kaduha sa East semi-finals diin nakabangon sila gikan sa 2-3 nga biya batok sa Philadelphia 76ers ug tulo ning maong series.
Sa Game 7 nga mga kombati nga ilang naagian, ang Celtics adunay 27-9 nga rekord diin midaog sila sa katapusang upat ka mga duwa samtang ang Heat adunay 6-5 diin napilde sila sa katapusang duha ka mga duwa.
Base niini, tataw nga nibali na ngadto sa Celtics ang momentum sa series.
Alang sa Heat, dili sila magpatay-og niini ug kinahanglan lang nilang magtutok ning katapusang duwa sa conference finals. “Let’s just rally around each other,” matod ni Heat Fil-Am
coach Erik Spoelstra. “These are emotional games and things can swing in that Game 7. The pressure can go back and forth in Game 7s quite a bit. We’re not going anywhere.”
Ang lider sa Heat nga si Jimmy Butler miangkon nga grabe ka lisod nga tahas ang ilang sagubangon ning sangkaa apan nagpabilin siyang masaligon nga makompleto nila kining maong misyon.
“You’re going to get the same test until you pass it, I swear,” asoy ni
Butler. “We were in this same position last year. We can do it. I know that we will do it. We’ve got to go on the road and win in a very, very, very tough environment.”
Ang modaog ning sangkaa mao ang makigharong sa Western Conference champion Denver Nuggets alang sa NBA Finals.