Robin Padilla mi-resign isip PDP-Laban EVP

Ni-resign na si Senador Robin Padilla isip executive vice president sa Partido Demokratiko Pilipino-Lakas ng Bayan (PDP-Laban).

Si Padilla niingon sa usa ka pamahayag nga iyang gitugyan ang iyang “irrevocable resignation” niadtong Mayo 29, 2023 aron “magtutok sa pagtuman sa akong mga katungdanan isip senador.”

Matod niya nga magpabilin siya isip miyembro sa political party.

“I believe my decision is for the good of the party and its members -- and more importantly, for the Filipino people,” matod ni Padilla. (Nagtuo ko nga ang akong desisyon para sa kaayuhan sa partido ug sa mga miyembro niini -- ug labaw sa tanan, para sa katawhang Pilipino.)

“As an incumbent senator with a heavy mandate, I am aware that other duties -- including my position as EVP of the party -must give way to my ability to fulfill my sworn duty to the people,” dugang niya. (Isip usa ka incumbent nga senador nga adunay bug-at nga mandato, nasayod ako nga ang ubang mga katungdanan -- apil ang akong posisyon isip EVP sa partido -- kinahanglan maghatag og dalan sa akong abilidad sa pagtuman sa akong gipanumpaang katungdanan ngadto sa katawhan.)

Si Padilla miapil sa partido nga gipangulohan ni kanhi Presidente Rodrigo Duterte niadtong 2021, mga bulan sa wala pa ang 2022 national polls dihang napili siya isip magbabalaod.

Ang pag-resign ni Padilla isip opisyal sa PDP-Laban nahitabo taliwala sa mga hungihong sa destabilisasyon batok kang House Speaker Martin Romualdez, presidente sa partido politikal nga Lakas-CMD. Nitumaw ang mga hungihong nunot sa pagka-demote ni Pampanga Second District Representative Gloria Macapagal-Arroyo gikan sa pagka senior deputy speaker sa House of Representatives ngadto sa pagka deputy speaker na lang.

Niadtong Mayo 19, ni-resign si Bise Presidente Sara Duterte isip chairperson sa Lakas-CMD.