Pagbalhin sa Cebu City Hall

Seguro panahon na. Ang pagbalhin sa City Hall sa dakbayan sa Sugbo gikinahanglan tungod sa nagkalapad nga dakbayan ug nagkadaghan usab ang mga kliyente sa sentro nga buhatan.

Usa sa dayag nga problema nga makita mao ang kakuwang sa parking area. Maglisod na sa pagdugang og espasyo tungod sa kakaraan na sa dapit. Daghang ubang mga edipisyo nga makasaysayanon usab sama sa Magellan’s Cross, Plaza Sugbo ug compound sa Basilica Minore del Sto. Niño de Cebu.

Ug mas mapreserbar ang karaang city hall kon mahimong usa ka heritage site o laing museum bahin sa pulitikanhong kalamboan sa dakbayan. Madungagan ang kasuroyan sa mga bisita labina sa langyaw nga nag-isip sa Sugbo nga tabunok sa bahandi sa kabilin.

Labaw sa tanan, ang bag-ong mahimutangan sa City Hall momugna og laing sentro sa ekonomiya ug makapadugang og alegre sa South Road Properties (SRP). Mabutangan og regular nga rota sa transportasyon alang sa katawhan nga dunay transaksiyon sa City Hall.

Klaro nga motumaw ang dagko ug ginagmay nga mga negusyo sa palibot hinungdan nga gihangop kini nga plano sa sektor sa mga magpapatigayaon, labina nga nindot ang desenyo ug pagkahiluna sa magbuntaog nga edipisyo nga dunay hulagway ug kabag-ohan.

Bisan asa sa giila sa City Planning and Development Office (CPDO) nga sugyot nga bag-ong lokasyon sa SRP sa duha ka ektarayng luna sa duol sa SRP, unom ka ektaryang luna tabok sa dalan sa Il Corso mall dapit sa Professional Schools, ug laing unom ka ektaryang luna nga mag-atubang sa Pond A.

Gikataho nga P800 milyunes ang gasto sa pagtukod sa bagong city hall sa SRP, uban sa P400 milyunes matag usa sa bagong executive building ug bag-ong legislative building. Kon may igong budget pa, maayong labaw pa niini aron paghimo sa sentrong buhatan sa dakbayan nga grande.

Maayong dili basta-basta ang bag-ong city hall, pasilungan kini sa tanang buhatan aron mahimong one-stop-shop sa mga kliyente sa Dakbayan.