CONVERGE, MAGNOLIA 2-0 TINGUHA

Mga duwa karon: 5:00 pm- Blackwater batok Terrafirma 7:30 pm- Magnolia batok Converge Mosuway pagkuha og bahin sa liderato ang Magnolia Chicken Timplados Hotshots ug Converge FiberXers sa ilang panagsangka sa main game ning Miyerkules, Mayo 31, 2023, alas 7:30 sa gabii, sa Philippine Basketball Association (PBA) On Tour sa Ynares Sports Center sa Pasig City.

Ang duha ka mga kampo parehong nabunyagan og dakong kadaugan ning maong pre-season tournament.

Ang FiberXers ni coach Aldin Ayo ninglampornas sa Terrafirma Dyip, 119-82, niadtong Mayo 26, 2023 samtang ang Hotshots ningmakmak sab sa Blackwater Bossing, 117-83, niadtong Mayo 28, 2023.

“We’re still in the process of building up,” matod ni Ayo nga napatik sa www.pba.ph.

Sa ilang 37 puntos nga pagmasaker sa Dyip, ang FiberXers gipangulohan nila ni

Justin Arana ug Jerrick Balanza pinaagi sa ilang 24 puntos matag usa.

Sa ilang pagpakigsangka sa Hotshots, ang FibersXers gipaabot makasugat og malisod na nga pagsuway.

Sa premirong duwa, magsangka ang Dyip ug Bossing sugod sa alas 5:00 sa hapon dala ang tinguha nga maisa og balik ang ilang morale human sa grabeng kastigo nga ilang naagian sa premiro nilang tahas.

Gibutyag ni Dyip coach Johndel Cardel nga ning higayuna, mokombati sila nga wala ang duha sa ilang mga sinaligan nga sila si JP Calvo ug Kevin Ferrer.

Si Calvo adunay sakit samtang si Ferrer (sprained ankle) naangol sa premirong duwa sa Dyip.

“Buti na lang maaga pagdating ng mga kamalasan na ito at hind sa regular conference,” matod ni Cardel.

Ang Bossing mokombati nga adunay kompletong puwersa. / ESL