HEAT MISULOD SA NBA FINALS
Human sa upat ka mga pagsuway, nakaabante gyud sa 2022-23 National Basketball Association (NBA) Finals ang Miami Heat pinaagi sa pagsugba sa host Boston Celtics, 103-84, sa deciding Game 7 sa Eastern Conference finals ning Martes, Mayo 30, 2023 (PH time).
Ang Heat sayong ningratsada sa best-of-seven series ug niposte dayon kini og tulo ka sunodsunod nga kadaugan alang sa 3-0 nga bintaha.
Apan sa wala damha, ang Celtics ninggukod ug ningbawos pagtali og tulo sab ka sunodsunod nga kadaugan aron pagpugos og Game 7.
Ning higayuna, gipaneguro sa Heat nga dili makakulit og kasaysayan ang Celtics isip labing unang puwersa nga hingpit nga makabangon gikan sa 0-3 nga biya pinaagi sa pagkontrolar hapit sa kinatibuk-ang kombati sa Game 7.
Gipangulohan ni Jimmy Butler ang Heat pinaagi sa iyang 28 puntos lakip na niini ang tulo ka three-pointers samtang nidugang og 26 puntos si Caleb Martin, lakip na niini ang upat ka three-point bombs.*
Sa pagsugod pa lang sa duwa, nakasinati na og angol sa iyang wa nga tiil ang lider sa Celtics nga si Jayson Tatum.
Nakapadayon ra man tuod pagduwa si Tatum apan tataw nga apektado ang iyang duwa tungod sa iyang pagkaangol.
Wala kini usiki sa Heat ug gipahimuslan nila’g maayo ang nahitabo ni Tatum.
“We stayed together as a group
and as a team,” batbat ni Butler.
“We talked about going to get a tough one on the road and we did just that. But we’re not satisfied. We’re happy. We’re ecstatic. But we’ve got one more to get.”
Ang Celtics maoy ningmugna sa nag-unang lima ka mga puntos apan human niini, hinayhinay na nga ningtidlom ang ilang poruhan.
Gipainit sa Heat ang ilang opensa ug dali nilang napapas ang labaw sa Celtics.
Sa hinapos nga bahin sa 2nd quarter, ang Heat nakaposte na og 17 puntos nga labaw.
Sa pagpangulo ni Derrick White, napahak sa Celtics ang labaw sa Heat ngadto sa pito na lang ka mga puntos, 66-59, sa sayong bahin sa 3rd quarter.
Apan sa 4th quarter, ningdilaab ang kainit sa opensa sa Heat aron hingpit nga dominahon ang sangka.
Ang Celtics gipangulohan ni Jaylen Brown pinaagi sa iyang 19 puntos, nihatag og 18 puntos si White samtang igo lang niamot og 14 puntos si Tatum.
Sa NBA Finals, ang Heat, nga nagtinguha sa ikaupat nilang kampyunato ug labing una gikan niadtong 2013, makigharong sa Western Conference champion Denver Nuggets.
Sugdan ang NBA Finals karong Hunyo 2, 2023 sa balwarte sa Nuggets, nga yanong ningpatsar sa Los Angeles Lakers, 4-0, sa West finals series.