Piniriso miambak sa 4th flr. sa jail, namatay

Namatay ang usa ka 25 anyos nga person deprived of liberty (PDL) kun piniriso human niambak sa ikaupat nga andana sa Cebu City Jail alas 4:30 sa hapon sa Martes, Mayo 30, sa Brgy. Kalunasan, dakbayan sa Sugbo.

Ang biktima nga 25 anyos, kinsang ngan gipapugngan, taga Brgy. Labangon, dakbayan sa Sugbo, namatay alas 6:10 sa gabii sa Martes, Mayo 30, sa Cebu City Medical Center (CCMC).

Si Jail Officer 3 Blanch Aliño, tigpamaba sa CCJ, nibutyag nga hikog ang motibo sa biktima.

Wala pa hinuon nila masuta kon unsay rason sa pagpakamatay niini samtang nagpadayon pa ang ilang imbestigasyon.

Sa initial nilang record, duna kiniy regular nga dalaw sukad nabilanggo niadtong 2020 gumikan sa kasong pagpamaligya og ilegal nga drugas.

MIAGI

Ang PDL nakalusot sa barikada sa gate paingon sa 4th floor pinaagi sa pagsagol sa ubang PDL nga dunay religious activity.

Dihang nakaabot sa ikaupat nga andana, nagdali kini og katkat sa bungbong dayon niambak.

Nasangit unta sa net kilid sa bungbong sa pasilidad apan niuntol dayon natagak ang biktima sa karsada.

Nag-una ang iyang sampot dihang nitugpa sa karsada.

Dali nila kining gidala sa tambalanan, apan namatay pipila ka oras ang nakalabay.

Ang mga kaubang piniriso nibutyag nga wala silay nabantayang timailhan kabahin sa laraw sa biktima.

Si Aliño nibutyag nga ang CCJ dunay mga psychologist nga mag-assist sa ilang mga PDL isip kabahin sa ilang medical intervention.

Gigukod na siya gikuptan sa usa ka PDL unya uwahi nakuptan ang short pero nakaambak.”

Jail Officer 3 Blanch Aliño