Dinamitero sa Lapu-Lapu ug turismo
Ang Pilipinas gilangkuban sa kapin sa 7,000 ka mga isla. Liboan pa niini ang wa mapuy-i og mga tawo ug naa say wa pa maduaw bisan makausa. Wa mapuy-i tungod kay layo Apan duna say mga isla nga giprotektahan sa nasudnon ug lokal nga mga kagamhanan aron mapreserbar ang iyang katahom ug ang iyang maanindot nga palibot.
Makapahasubo nga duna say mga tawo nga way paghuna-huna sa linugdangan sa ilang gibuhat aron lang sila makapahimulos, sama sa mga nagdinamita sa mga isda sa kadagatan sa dakbayan sa Lapu-Lapu.
Makapahasubo kaayo huna-hunaon nga samtang ang Siyudad nga gipangulohan ni Mayor Junard “Ahong”Chan naninguha nga mapalambo pa og maayo ang turismo sa dakbayan, naa say mga tawo nga nagguba niini.
Ang paggamit sa dinamita sa pagpangisda nakaguba sa bahandi sa kadagatan sa dakbayan sa Lapu-Lapu. Bahandi nga unta usa sa mga makapadani sa mga turista nga mahilig sa pagsawom sa dagat. Daghang mga turista nga hilig og sea diving.
Unsa pa may imong sawmon kon wa kay makitang maanindot nga mga talan-awon ilawom niini kay pulos na lang mga bato sa ilawom? Guba na ang corals ug patay na ang mga isda.
Diha pay higayon nga duna nay dolphins nga nakit-an sa kadagatan sa Siyudad nga gipasigarbo ni Chan ug buot niyang magpabilin ang mao nga mga mananap sa kadagatan. Apan kinsa pa may magpabilin sa kadagatan nga naa ang kakuyaw sa dinamita? Usa kini sa makapaislag sa mga dolphin.
Di lang turismo ang maapektuhan, kon di ang long term nga kahinguhaan sa mga mananagat nga nagsalig sa pagpangisda sa ilang inadlaw nga panginahanglan.
Sa dinamita way gipili niini, dagko ug gagmay pa nga mga isda mamatay ning mao nga matang sa eksplusibo. Daghan pang katuigan ang paabuton una maulian ang dagat nga maigo sa dinamita.
Busa, daghan tuod ang makuha nga isda apan wa nay ugma ug umaabot pang katuigan tungod sa dakong kadaut mugna sa pagbuto.
Hinaot pang tinud-on og bantay ug gukod ni Chan ang mga dinametero kay kon nasuko siya sa mga vandal, kining pagdinamita mas grabe pa og gibuhat kay lapad ang iyang kadaot nga nahimo. Gipatay niini ang kadagatan nga magdaot sa turismo ug panginabuhi mismo sa mga mananagat.
Angay pang pahugtan sa mga LGU ang pagbantay sa kadagatan, labina sa dakbayan sa Lapu-Lapu kon gusto man kining molambo pa og maayo ang turismo ug ekonomiya sa kinatibuk-an.