Unsaon pagpanguyab?
Dear Noy Kulas,
Kumusta? Tagoa lang ko sa ngalan nga Julian. Kahinumdom man seguro ka nako, kadtong nagsuwat nga obese.
Karon akong problema, Noy Kulas, medyo ni niwang na ko gamay. Naa diay koy good news nimo. Nakakita na ko og prospect pero ang problema lagi kay nagkinahanglan ko og motudlo nako unsaon sa pagpanguyab. Mangayo lang unta ko og tambag nimo, Noy, kay ako man tong sender nga NGSB (no girlfriend since birthday). Ambot kon nakahinumdom ka pa.
Nagkinahanglan gyud ko og tambag o makatudlo nako unsaon sa pagpanguyab aron matabangan ko. Daghang salamat.
JULIAN
Julian,
Malingaw baya kong magbasa aning mga suwat nga ingani but tinuod kaayo, dunay mga lalaki nga wa gyud kasuway og uyab sukad sa pagkabata tungod sa ilang inferiority complex. Bisan unsaon, naa ka niini nga character mao nga sa una nimong suwat ang imong pagka obese ang imong gihunahuna ug naproblemahan. Di sa tanang higayon nga ang babaye magtan-aw og hitsura o bayhon sa lalaki, kon di ang pagkatawo niini.
Way specific nga formula ang pagpanguyab kay ang estilo managlahi sa matag babaye. Naa gani ubang babaye di na kinahanglan panguyaban kay na-attract na dayon siya nimo o duna na moy mutual understanding tungod sa inyong kasuod. No need to court but ang language sa inyong mga lihok nagpakita niini. Mao nang niingon ko nga usahay di na mo matter sa babaye kon obese ka ba o di. Matod pang Papa Joe, ang usa sa ganahan sa babaye ang kanang lalaki nga dunay sense of humor. Tingali serious sab ka nga pagkatawo. Di ganahan og boring nga lalaki ang babaye. Ilha una ang babaye og maayo. Ipakita niya nga duna kay interest niya, makaila niya ug unsay iyang mga interest sa kinabuhi. Kanang makita sa babaye nga interesado kang makaila niya. Kon imong kauban sa trabaho o club ug organisasyon, suora og suway.
Kon di, ipakita na lang niya ang intention nimo pinaagi sa pag invite niya og dinner, event o suroy. Kana apil sa mga paagi nga makakita ang babaye nga interesado ka niya. Kon friends mo sa Facebook, mo chat ka niya aron pag strike og conversation.
Hinaot pang motampo sa Facebook ang uban natong readers sa ilang tips. Apan hinumdomi kanunay, ang una mong i-conquer mao ang imong inferiority complex. Kon di ka makahimo niana, bisan pag unsaon mo, di ka makahimo sa pagpanguyab.