KONTRABIDA ICONS SA PINOY MOVIES ASA NA KARON?
Sila ang mga banggiitang mga kontrabida sa panahon ni Fernando Poe Jr. ug sa kasikatan sa action films niadtong dekada `80 ug`90. Gani, ang uban nila maisip nang mga haligi sa industriya. Nakahinumdom pa ba mo nila? Tan-awa kon unsa nay ilang kinabuhi ug hitsura karon.
ZANDRO ZAMORA
Siguradong pamilyar mo ni Zandro Zamora kinsa dili gyud mawa sa mga pelikula niadto nilang FPJ, Rudy Fernandez, Tony Ferrer ug Bong Revilla. Ang 72-anyos nga si Zamora dugay nang niretiro sa Los Angeles, California apan piskay pa gihapon. Nahilig ni karon sa pagkanta sa videoke. / Tiktok, Facebook
RUEL VERNAL
Tua na nagpuyo sa Florida, U.S.A. si Ruel Vernal ug 76 anyos na. Ang iyang mga anak parehong mga American citizen. Si Vernal nisikat sa mga pelikula ni FPJ ug isip unang endorser sa Red Horse Beer niadtong 1982. Niadtong 2021 si Vernal gipalitan og awto ug balay sa iyang anak sa U.S. apan siya na karoy tigbantay sa iyang mga apo./ Pep.ph, Facebook
VAL IGLESIAS
Usa ka beteranong stuntman ug legendary stunt director, ang 74-anyos nga si Val unang nigawas sa pelikulang “Santiago” ni FPJ niadtong 1970. Siya ang fight instructor sa action films nilang Robin Padilla, Ronnie Ricketts ug Rudy Fernandez. Nigawas siya sa ABS-CBN’s “Ang Probinsyano” ug karon sa “Batang Quiapo.” Nagpuyo ni karon sa Pasig./ ABS-CBN, Facebook
KING GUTIERREZ
Dili sab mawa niadto sa mga pelikula ni FPJ si King Gutierrez. Apan dihang nawala ang action movies, si King nisulod sa Philippine Army Reserve Command niadtong 1999 isip master sergeant. Napili siyang konsehal sa Bacoor Cavite niadtong 2013 ug na reelected pag-2016. Ang 67-anyos makita usab sa ABS-CBN’s “Batang Quiapo.”/ Bacoor.gov.ph
RAUL ARAGON
Kuntento na sab si Raul Aragon sa iyang pribadong kinabuhi sa Amerika uban sa iyang mga apo. Mokabat sa 150 ka mga pelikula ang iyang nahimo sukad niadtong 1969 hangtod 1995. Siya ang leading man ni Nora Aunor sa “Ina Ka Ng Anak Mo” diin siya nidaug nga best actor sa 1979 Metro Manila Film Festival./ Wikipedia, Facebook
DINDO ARROYO
Sukad niadtong 1989 nakahimo og 123 ka mga pelikula si Arroyo. Apan niadtong 2014 na-diagnosed siya og stage 4 liver cancer. Apan ang pinakasakit, alang niya, ang pagkamatay sa iyang asawa niadtong 2009 tungod sa heart attack. Dako ang pasalamat sa 63-anyos nga naulian pa ug nakabalik sa pag-arte sa “FPJ: Ang Probinsyano” ug “Batang Quiapo.” Inquirer.net/Facebook
CHUCK PEREZ
Si Chuck Perez unang nagbida sa pelikulang “Bagwis” apan mas nisikat siya isip kontrabida, lakip na sa papel nga halimaw sa “Shake, Rattle & Roll V” niadtong 1994. Si Perez 58 anyos na karon ug tua na sa Amerika nagtrabaho isip medical supplier. Basi sa iyang mga hulagway nitambok na ang aktor./ Pep.Ph