JUNE MAR UG KAUBANAN DI PA KADUWA
Dili pa makaduwa ang unom ka mga regular rotation players sa San Miguel Beer alang sa PBA on Tour gumikan sa lainlaing mga rason.
Ang 6-time PBA MVP nga si June Mar Fajardo padayon pang nagpaalim sa iyang injury nga iyang naangkon niadtong Marso atol sa EASL Champions Week sa abroad.
Si Fajardo, sa nakalabay nga mga semana, nakit-an sa iyang mga post sa social media nga nibakasyon sa iyang yuta nga natawhan sa lungsod sa Pinamungahan sa lalawigan sa Sugbo.
Sa mga stars nga mataodtaoran pa ang pagbalik, si Vic Manuel maoy gipanglantawan nga labing dugay sanglit bagohay lang siya nga gioperahan sa iyang injury.
“Vic was operated on. He is in therapy. He will be out for six
weeks,” matod ni SMB coach Jorge Gallent sa spin.ph.
Si San Miguel coach Jorge Galent nagkanayon nga kinahanglang operahan si Manuel aron ayuhon ang angol sa iyang wala nga tuhod nga makapugos kaniya nga dili makaduwa sa PBA exhibition series.
Samtang sila si CJ Perez, Marcio Lassiter, Chris Ross, nagpahuway ug nagpaalim sa ilang minor injuries human nakaduwa sa Gilas Pilipinas sa ilang paglangkat sa gold medal sa Southeast Asian Games.
“They have to rest. When they were practicing, we were resting. Now, this is their time to get back their legs,” dugang ni Gallent sa samang interbyu. Samtang nagpahuway, nilarga si Lassiter sa gawas sa nasod aron bisitahon ang iyang inahan, samtang si Ross nipailawom og procedure alang sa iyang tuhod niadtong Biyernes. Sa kasamtangan, ang San Miguel Beer adunay 1-1 win-loss record sa sayong bahin sa torneyo. Gipaabot nga inig balik ni Fajardo ug kaubanan, mabalik na usab ang pwersa sa San Miguel nga gikahadlukan sa PBA.