Mulo sa operators wa gitagad
Nagkaduol na ang adlaw sa hingpit nga deadline sa consolidation sa pag-operate sa mga public utility jeepney alang sa paghimo ngadto sa pagka kooperatiba subay sa Public Utility Vehicle Modernization program.
Apan wa pa natubag ang mga kabalaka sa mga operator ug driver kalabot sa modernisasyon nga ilang gikabalak-an nga magpahamtang og bug-at nga galastuhan kanila. Mahal kaayo ang mga sakyanan nga pamaliton aron makatuman sa gilatid nga specifications nga gitakda sa kagamhanan.
Bisan tuod wa mopiyait og maayo ang mga kooperatiba, apan ang kabalaka sa yanong mga operator ug driver nga wa pa nag consolidate dunay igo nga basehanan. Ang mga coop dinhi sa Sugbo nipasabot sa ilang panginahanglan sa dakong kita sa matag unit aron sila makadata ug maka operate og padayon.
Di pa ni mao. Sa congressional hearing kabahin sa PUV modernization, ang ngalan sa prangkisa iya na sa kooperatiba bisan kon ang operators mao ang dako kaayo og gasto sa pagpalit ug pagproseso. Naay uban ning-angal kay gawas nga gitangtang ang ilang ngan sa prangkisa, gikiha pa sila og carnapping nga sila man ang tag-iya sa units.
Kini nga mga isyo mas maayo nga maresulbar una pa hingpit nga ipatuman ang PUV modernization program. Kini mga buslot sa mga probisyon sa programa nga angay korihian ug tarungon.
Klaro nga balido ang ilang mga reklamo kon basehan ang gimulo sa mga kooperatiba dinhi sa Sugbo ug Metro Manila. Inay pugson og maayo ang sektor sa transportasyon nga nagpabilin nga wa magtipon, mas maayo nga himoan una og lakang ang ilang gimulo sa ingon wa na silay lusot.
Sa pagkakaron, ang ilang gireklamo wa pa natubag sa kagamhanan, inay gipugos nga mopatuman sa deadline sa consolidation bisan nagkalisod na ang operators. Kon di tagdon, ug pasagdan lang sab ang wa nisunod, inhustisya usab kini sa mga ningtuman sa modernization program.