200K ka deboto nangapil sa seaborne procession

Nangunay ang hepe sa Police Regional Office 7 nga si Police Brigadier General Anthony Aberin sa pag inspection sa iyang mga personnel nga gipakatap sa mga pantalan ug kadalanan sa dakbayan sa Sugbo atol Seaborne Procession.

Gisiguro ni Aberin nga napakatap nga maayo ang iyang mga sakop aron makab-ot ang kahusay ug kalinaw sa relehiyusong kalihukan. Matod ni Aberin nga malinawon ra ug walay natala nga krimen ang kapulisan gikan sa kaadlawon hangtod nga natapos ang procession sa Basilica Minore del Santo Niño.

Iyang gibana-bana nga naa sa 200,000 ka mga deboto ang ningsaksi ug ningsalmot sa fluvial procession.

“So, far very generally peaceful po yung mga nangyaring activities because we have not received any incident that might have affected the ongoing celebration,” matod ni Aberin sa mga tigbalita sa Sabado sa buntag.

Dako og natampo sa malinawon nga procession ang kooperasyon sa katawhan lakip na ang hinusang paghatag sa siguridad sa kapulisan, kasundalohan, Philippine Navy, Philippine Coast Guard, Bureau of Fire Protection (PCG) ug ubang ahensya sa gobyerno, lakip na ang force multipliers ug mga tinun-an sa lainlaing tunghaan.

Samtang gipahimangnoan ni Aberin ang katawhan nga mosaksi sa Sinulog Grand Parade karong adlawa, Enero 21, 2024 nga dili na magdala og mga butang nga gidili o ilegal.

Lakip na ang pagdala og dagko nga mga bag sama sa travelling bag ug mga bata nga gagmay pa kaayo nga dili makaantos sa kainit sa adlaw aron dili makasugat og problema.

Pasabot ni Aberin nga malikayan nga dunay mawagtang nga mga bata taliwala sa kadaghan sa mga tawo nga mosaksi. /