45K KA PAMILYA APEKTADO SA BAHA, LANDSLIDES
Ang House of Representatives, pinaagi sa mga buhatan ni Speaker Ferdinand Martin G. Romualdez ug Tingog Party-list, ug sa pakigtambayayong ni Presidente Ferdinand R. Marcos Jr., nagpahigayon sa hinanaling pagpagawas sa P35 milyunes nga hinabang pinansyal ug 17,500 ka food packs isip hinabang alang sa pito ka mga distrito sa kongreso nga naapektuhan sa bagohay nga pagbaha ug pagdahili sa yuta sa Davao Region.
Sa usa ka pamahayag kaniadtong Biyernes, Enero 19, gipasiugda ni Romualdez ang pagkadinalian sa ilang mga paningkamot, nga nagpunting sa padayon nga hapsay nga paghatod sa daghang tabang sa mga naa sa Davao Region nga grabe nga naapektuhan sa natural nga kalamidad.
Sumala sa National Disaster Risk Reduction and Management Council, dul-an sa 45,000 ka mga pamilya, nga naglangkob sa kapin sa 187,000 ka mga tawo, sa rehiyon ang naapektuhan sa pagbaha ug pagdahili sa yuta.
Usa ka pagdahili sa yuta nilubong sa labing menos 13 ka mga tawo, diin pito na ang kompirmadong patay, sa Purok 20, Pag-asa, Barangay Mt. Diwata, Monkayo, Davao de Oro niadtong Huwebes, Enero 18, 2024.
Si Jergrace Cabag, information officer sa Local Government Unit (LGU)-Monkayo, nitug-an sa SunStar Davao sa pakighinabi sa telepono nga pito sa mga biktima kompirmadong patay, usa ang kritikal, ug nagpadayon ang pagpangita sa laing lima.
“Sa hinay-hinay nga retrieval kay naghimo man ta og search and retrieval rescue operations naa tay nakuha nga pito ka mga patay ug usa ka grabeng naangol ,” matod ni Cabag.
Matod niya nga ang nasamdan daling gidala sa Davao de Oro Provincial Hospital alang sa dinaliang medikal nga pagtagad, samtang ang nangamatay gipadala sa funeral parlor.
Ang pagdahili sa yuta nahitabo atol sa usa ka prayer meeting sulod sa usa sa mga panimalay, nga misangpot sa kadaghan sa mga biktima.
Sa alas 3:34 sa hapon, sa samang adlaw, temporaryo nga nahunong ang search, rescue, ug retrieval operations tungod sa nagpadayong pagdahili sa yuta ug kusog nga ulan.