Salamat sa Kahitas-an

Minilyon ka katawhan ang nag-ambahan sa laing tuig sa kapistahan ni Sr. Sto. Niño de Cebu ug ang Sinulog Festival sa Dominggo, Enero 21, 2024. Ug mapasalamaton kita sa Kahitas-an nga nagmalampuson ug malinawon ang tanang mga kalihukan, relihiyuso ug kulturanhon, alang sa kapistahan.

Kamatuoran kini sa makanunayong paggiya ug bendisyon sa balaang bata sa Sugbo, ang bato balani sa gugma nga si Sr. Sto. Niño.

Niadtong Sabado, ala 1:00 sa hapon, Enero 20, gibana-bana sa kapulisan nga dili mominos sa 1.2 milyunes ka debotos ang ning-apil sa Solemn Foot Procession.

Hinuon, sumala sa kapulisan, mas gamay kini kon itandi sa miaging tuig nga gibana-bana nga tres milyunes ka mga debotos.

Sama sa naandan, sukad sa pag-abli sa nobinaryo sa Basilica Minore del Sto. Niño nagsugwak gihapon sa mga nanagkot ug nanambong sa misa.

Samtang, bisan sa mga isyo kabahin sa venue sa Sinulog festival sa South Road Properties (SRP), mabulukon ug alegre ubos sa kainit sa adlaw.

Dili ingon kadaghan ang contigents kon itandi sa nangaging katuigan, apan nindot ug gi-level up ang ilang presentasyon.

Sumala sa kapulisan, way natala nga dagkong krimen gawas lang sa dunay nangalipong tungod sa kainit ilabi na kadtong edaran na.

Dunay mga medical station sa ruta sa prosisyon ug liboan ka mga polis ug ubang security units sa hinungdan nga kaayo makalihok ang mga dautang elemento.

Tungod niini, takos usab sa pagdayeg ang otoridad nga nagbantay sa seguridad ug mga organizer uban sa mga opisyal sa dakbayan.

Lakip sa pasalamatan mao ang publiko o katawhan nga dako og natampo alang sa pagmintinar sa kahusay ug kalinaw atol sa kapistahan.

Manghinaot kita, uban sa pag-ampo, nga magpadayon ang grasya ni Sr. Sto. Niño sa Sugbo ug makalabang kita sa mga umaabot nga hagit sa atong pagpakabuhi.