Kolektor gipusil; agalon nagpusil sa iyang kaugalingon

Duha ka mga tawo nangahilandig sa tambalanan tungod sa pagpamusil sa Purok Kalubasa, Barangay Pitalo, lungsod sa San Fernando, alas 11:05 sa buntag sa Lunes, Enero 22, 2024.

Ang biktima giila nga si Catherine Dioba, 28, dalaga, dunay kapuyo, samtang ang suspek mao si Martin

Juezan, 76 , minyo, lumolupyo sa samang dapit.

Nasayran sa Superbalita Cebu pinaagi sa imbestigasyon sa kapulisan sa San Fernando sa ilang deputy chief of police nga si Capt. Ramuel Banogon, ubos sa kamanduan sa ilang hepe nga si Maj. Mark Anthony Villanueva, nga tungod kini sa bangi sa salapi.

Ang suspek nasuko sa biktima human giingong wa magtinarong og remit sa iyang pagpaningil sa gipadagan nga pagpautang og kuwarta sa mga tawo. Ang biktima maoy gihimong tigpaningil.

Matod pa nga samtang si Dioba didto sa silingang balay nila nakig-inom, si Juezan kalit nga niabot ug kalit nga gipusil ang biktima. Apan wa maigo ug nidagan pauli sa ilang balay. Giusban siya og pusil ug naigo na sa iyang buko-buko.

Matod pa nga sa dihang daling girespondihan sa mga polis sa San Fernando ang maong alarma sa pagpamusil nga gipangulohan ni Banogon, nakadungog na lang sila og buto sa armas.

Sa ilang pagsulod sa shop sa suspek, ilang nadiskonrihan ang suspek nga naglingkod sa usa ka lingkuranan nga nagpusil sa iyang kaugalingon sa dughan.

Ang biktima ug suspek daling gipangtabang, gidala sa Rural Health Unit (RHU). Atol ning pagsuwat, pulos na sila luwas og kahimtang.

Ang kapulisan mohimo pa sa ilang dugang imbestigasyon sa maong kaso kon tinuod ba nga maoy motibo sa pagpamusil.