Mga leksyon sa Sinulog
Tinuod, malampuson ang kulturanhong kasaulogan sa kapistahan ni Sr. Sto. Niño kon ang kadaghanon sa mga tawo ang hisgutan. Wa say dagkong mga krimen nga nahitabo, gawas sa pipila nga ginagmay nga kasamok sama adtong gikulata nga batan-ong lalaki nga nanghawok og babaye.
Naa say gidakop kay giingong nagbinastos sa mga polis hinungdan nga nangabalhug sa prisuhan.
Apan dunay nangreklamo sa venue sa street dancing tungod sa kainit. Sa coverage sa SunStar Cebu ug Superbalita Cebu, ang mga dancer nangreklamo sa grabeng kainit sa dapit. Way kapasilungan ang contingents ug mga tawo nga nanan-aw.
Nag-iyahay intawon sa pagpangita og kapasalipdan ang mga nanan-aw kay bantang kaayo sa init.
Matod sa contingent sa Brgy. Banilad, labing minos duha nila ka dancers gidala sa ospital human nangakuyapan. Gusto unta nila sa Cebu City Sports Center (CCSC) kay duna silay kapasalipdan nga mga kahoy ug building.
Gawas niini, duna say mga manindahay nga nangreklamo kay bisan duna silay permit sa pagpaninda, dunay mga limitasyon sa mga lugar nga ilang matindahan. Naay wa kaagwanta nihilak kay lugi kaayo siya sa iyang puhonan.
Kini nga mga butang di unta mahitabo kon gihuna-huna pa og maayo sa mga opisyal sa Siyudad kini nga mga konsiderasyon.
Balido kaayo ang reklamo sa tumang kainit sa South Road Properties (SRP). Lahi sa naandan o karaan nga rota, dunay mga kahoy ug building diin makapasalipod ang contingents ug manan-aw.
Kon diha man sa SRP, gipaninguha unta sa Kagamhanan sa Siyudad ang pagbutang og shades alang sa contingents ug mga manan-away, kana kon magpakabana ang mga opisyal nga apil sa pipila lang nga makapasilong sa gitukod nga grandstand.
Kadtong vendors, di usab pig-utan og maayo sa mga opisyal ug seguraduhon nga strategic ang lugar nga tindahan aron mokita usab sila sa kapistahan ni Sr. Sto. Niño. Total, kausa ra tawon ni sa usa ka tuig, di kada adlaw mahitabo.