Sarno: 47K ka pirma natigom sa pag-usab sa Konstitusyon
Mokabat sa 47,000 ka pirma gikan sa People’s initiative ang nadawat sa Commision on Elections (Comelec) Cebu City South District sa paningkamot nga usbon ang pipila ka mga probisyon sa 1987 Philippine Constitution.
Si Atty. Marchel Sarno, election officer sa Cebu City South District, niingon sa interbyo niadtong Huwebes, Enero 18, 2024, nga sa pagkakaron nipagawas na sila og sertipikasyon nga nadawat na nila ang signature campaign.
Ang 47,000 ka mga pirma, matod ni Sarno nilapas na sa tres porsiyento sa mga rehistradong botante sa matag legislative district.
Si Sarno niingon nga ang Cebu City South District adunay dul-an sa 400,000 ka mga rehistradong botante.
Isip legislative district nagkinahanglan lang kini og 12,000 ka mga pirma sa mga rehistradong botante aron iduso ang inisyatiba sa katawhan.
Sa Cebu City North District, si Sarno niingon nga walay report nga gisumiter ang signature campaign sa maong legislative district.
“Amo lang i-certify kon pila ka mga signature ang among nadawat and if si Comelec mo issue og order nga i-verify ang signature, usa mi mo verify,” matod ni Sarno.
“Ang signatures kay wala pa nato gi check, whether registered voter ba ug pareho ba ang iyahang stroke sa iyahang signature,” dugang niya. Sumala sa 1987 Constitution, ang signature campaign o people’s initiative provision nagtugot sa mga rehistradong botante nga direktang mosugyot og mga kausaban sa Konstitusyon nga nag-ingon nga
“through initiative upon a petition of at least 12% of the total number of registered voters, of which every legislative district must be represented by at least 3% of the registered voters therein.”