Di lang kutob sa pagpatay
Nakurat ang pamilya ni Lapu-Lapu City Public Market assistant administrator, Christopher Ceniza nga ilang kaila ang gitumbok nga utok sa pagpatay sa opisyal. Ang lain nga giingong mastermind usab nagtrabaho kanhi sa local government unit (LGU).
Si Mayor Junard “Ahong” Chan nga nangusog sa pagpasulbad sa pagpatay sa usa sa mga tawo nga iyang sinaligan nibutyag nga “payola” ang motibo sa pagpatay kang Ceniza. Sa ato pa, dunay naligsan si Ceniza sa panguwarta sa merkado publiko sa Brgy. Poblacion.
Matod sa mayor nga gibadlong ni Ceniza ang mga tawo nga posibleng nangalambigit niini ug hayan maoy nagtukmod sa pagpatay sa opisyal nga gihulagway nga kugihan, di mobalibad sa mga mando sa mayor nga ipabuhat kaniya.
Kon tinuod man nga dunay payola kun panguwarta sa abangan sa merkado publiko sa dakbayan sa Lapu-Lapu, hayan dugay na kaayo kini ug nakabenepisyo na og maayo sa pipila ka mga tawo ug opisyal sa mao nga dapit. Kay maputol na man ang ilang pangurakot, nahukman ang pagpatay kang Ceniza.
Angay nga paladman pa sa mayor ang imbestigasyon sa pagdumala ug inadlaw nga pagpadagan sa merkado publiko aron mahunong na ang mga binuang nga klaro nga nagbiktima sa yano nga vendors. Kon tinuod man ang nadawat nga taho sa mayor, dugay nang gihimo nga gatasan sa pipila ka mga tawo ang vendors gamit ang abang sa stalls.
Hayan wa lang kini maglambigit og duha o tulo ka mga tawo, kon di daghan pa. Nagkumboya sa ilang pagpanguwarta. Kon pasagdan lang kini sa mayor, basin sa umaabot nga panahon duna na say laing opisyal nga tumbahon kon mosuway sa pagluka sa nakagamot na nga kurapsyon sulod sa merkado. Lisod kon kwarta na ang hisgutan tungod kay makalimot na sa panagkauban ug panaghigala. Mopatigbabaw ang kagarapal sa kwarta nga gipakisama nga ginoo.
Gawas sa pagpasaka og mga kaso batok sa nalambigit sa payola, mas maayo nga kon duna may magnunot nga imbestigasyon, duna say mangatangtang nga personnel kon nalambigit kini sa panguwarta. Sa ato pa, di lang diha kutob sa pagpatay kang Ceniza, kon di sa tinubdan sa krimen ug nagtukmod sa mga utok sa pagpatay kaniya.
Gikinahanglan nga dunay ipatuman nga mga kausaban si Chan aron malimpyo sa mga buluyagon ang merkado publiko. Kay imposible kaayo nga way opisyal ug personnel sa LGU nga nalambigit niini.