Pension sa 6 ka tuig na nga patay gikobra pa

OVERLAND PARK, KansasUsa ka magtiayon sa Kansas gipasakaan og kaso sa pagpanglimbong kay nikolekta og kapin sa $215,000 nga retirement benefits alang sa namatay nga kabanay samtang ilang gitagoan ang iyang lawas sulod sa ilang balay sulod sa unom ka tuig.

Ang giingon nga nagkunsabo mao ang anak nga babaye sa pensioner ug bana niini.

Ang mga otoridad niingon nga ang pacemaker ni Mike Carroll nagpakita nga siya namatay niadtong 2016 sa edad nga 81, apan ang mga polis sa Overland Park wala nakadiskubre sa iyang lawas hangtod sa 2022 human ang iyang umagad nga lalaki nga si Kirk Ritter, nanawag sa kapulisan aron i-report ang iyang pagkamatay sa suburb sa Kansas City.

Ang mga prosecutor niingon nga sila si Lynn Ritter ug Kirk Ritter, parehong 61, nagpadayon sa pagdeposito ug paggasto gikan sa bank account ni Carroll bisan kon ang iyang lawas nahimo’ng “mummified” sa usa ka higdaanan sa balay nga iyang gipanag-iya. Si Lynn Ritter anak nga babaye ni Carroll.

Ang mga sakop sa pamilya nisulti sa Kansas City Star nga ang magtiayon nga Ritter balikbalik nga ninghatag kanila og mga alibay kon nganong si Carroll dili makatawag sa telepono o makabisita samtang sila gipatuo nga si Carroll buhi pa.

Ang magtiayon kinahanglan moatubang sa federal nga korte aron atubangon ang daghang mga kaso unya sa Pebrero 2.

Wala sila ningtubag sa mga mensahe sa telepono ug email gikan sa mantalaan, ug ang mga dokumento sa korte wala maglista sa usa ka abogado sa depensa nga nagrepresentar kanila.

Ang mga prosecutor niingon nga ang pension ug Social Security nga mga bayad nga nadawat ni Carroll sulod sa unom ka tuig human sa iyang kamatayon mokabat sa $216,067.

Apan ang mga rekord sa banko gikan niadtong panahona nagpakita sa mga tseke nga gisulat gikan sa iyang bank account ug gi-cash ni Lynn ug Kirk Ritter.